Nunatsinni siussarluttut sullinneqarneri pisoqaavallaalersoq
Tusartaatit assigiinngitsut marluk ullumikkut atorneqarput. Analogit, qangatoortut nipinillu tamanik sakkortusaasuusut, taavalu digitalit 1990-ikkunni tunisaalersut. Digitaliusut pisorpaluiaatitaqarput, soorlu assersuutigalugu biilit ingerlaarpalunneri imaluunniit inuppassuit katersuussimaffigisaanni inuit ataatsikkoorlutik oqalunnerannik pisorpaluiaasarlutik.
-Nunani killerni tamani tusartaatit pisoqqat analogiusut annikitsuinnarmik atorneqarput, siutinut ajoqutissartai iluaqutissartaanit annerummata. Nunatsinnili tamanna ilisimaneqanngilaq. Kalaallit Nunaanni napparsimmavik aqqutigalugu tusartaatinik analogiusunik taamaallaat pissarsinissamut periarfissaqarpoq, Jacob Albelsen, Atassut tunuliaqutaralugu qinigassanngortittoq nassuiaavoq.
Tamatuma kingunerisaanik inuppassuit - pingaartumik utoqqaat - tusartaatitik atorneq-ajorpaat, tusartaatit analogiusut siutinut ajoqutissartaat sorpassuartigut iluaqutissartaannit amerlanerummata. Tamatuma malitsigisaanik inoqatinut attaveqarnissaq pingaartueqartoq pinngitsoortarpoq inuiaqatigiinnullu avatiminniittunut mattussimasutut inissisimalersarlutik.
-Tamanna ajuusaarnartupilussuuvoq, siussarluttorpassuimmi imminut mattuttarput oqallinnernullu nalinginnaasumillu oqaloqateqarnissamut tunuarsimaalersarlutik. Taamaammat Nunatsinni siussarluttut tusartaatinik digitaliusunik pissarsisinnaanissaat piaarnerpaamik misissorneqartariaqarpoq, tamanna siussarluttut susassareqatigiinnikkut atugaannut annertuumik iluaqutaassammat. Siussarluttyut ullumikkut pissutsinut naleqqunnerusumik sullinneqannginnerat akuersaarneqarsinnaanngilluinnarpoq, Jacob Abelsen oqarpoq.
