Nunatsinni sanaartornerit ingerlallualerput
Sanaartornerit arlallit nunatsinni ingerlallualersimasut landskarsip sanaartornernut aningaasaateqarfiani aningaasat uninngasuutaasuni malugineqarsinnaavoq.
Ilimmarfik, Kujataani erngup nukinganik innaallagissiorfissarsuaq, Sisimiuni Ilulissanilu ilinniartut ineqarfissaat sanaartukkat aallartinneqareersut anginerit ilagaat.
Sanaartugassanut aningaasaateqarfik ukiut arfinillit matuma siornagulli aallartinneqarmat, aatsaat taama imarisai ikileriartigisut, Namminersornerullutik Oqartussat allattoqarfiani immikkoortortami aningaasaqarnermullu pisortaq Just Olsen ilisimatitsivoq.
Ukioq 2004-mi koruunit 684 millioni sinneqartut aningaasaateqarfiup kontoaniittut siorna 46 millioninik ikileriarput, tamannalu sanaartornerup ilorraap tungaanut aallarneranik takutitsinerusoq, allattoqarfimmit nalilerneqarpoq.
Aningaasat uninngasuutit amerlaginarsinnaagaluarput, uninngasuuteqarnerli ajoriinnagassaanngilaq, tamarmimmi siunertamut aalajangersimasumut atugassanngorlugit immikkoortinneqarsimammata.
Sanaartugassat piareersarlugit aallartinneqareersut imaluunniit sanaartorlugit aallartinneqareersut aningaasaateqarfimmit akilerneqartussaapput.
Aningaasaateqarfimmi uninngasuutit amerliartorunnaarlutik ikiliartornerat ineriartornerup pitsanngoriartorneranik aamma takutitsisuuvoq, aappaagu suli ikileriarnerunerunissaat naatsorsuutigalugu, Just Olsen aamma oqarpoq.
