Naalakkersuisut kissaatigippassuk qallunaat naalakkersuisuisa Kalaallit Nunaanni sakkutooqartualernissaa kissaatigaat.

Inuttanik, qulimiguulinnik sorsuutinillu sungiusaaniarluni tikisitsisarneq naammakkunnaarpoq.

Taama Danmarkip illersornissamut ministeria Troels Lund Poulsen sapaatip-akuunnerata aallartinnerani DR-imut oqarpoq:

- Kalaallit Nunaannut naleqqussinnaasunik suleqatigisinnaasatsinnik qallunaat illersornissaqarfiannit amerlanerusunik najuuttuaannartussanik peqartariaqartugut isumaqarpunga. Issittumi tunngaviusumik ilinniarneq allaluunniit pineqarsinnaavoq, taamaattumik sungiusaaginnarneq pinnagu ataavartumik maaniissinnaaniassagatta, ministeri DR-imut oqarpoq.

Allagaatigisaq DR-ip pissarsiaa naapertorlugu Danmarkip Issittoq pillugu isumaqatigiissut 2 pillugu isumaqatiginninniarnermi, pilersaarutit malillugit septembarip ingerlanerani aallartittussami, siunnersuut taanna saqqummiuppaa.

Sakkutooqatigiit nutaat ‘periaasissamut tunngasunik suliassanik annikinnerusunik’ soorlu sorsuutini-, nakkutiginninnermi annaassiniarnermilu suliassanik ikiutaassasut, DR allappoq.

Tyskit illersornissamut ministeriata tikeraarneranut atatillugu sapaatip-akunnerani matumani tusagassiortunik katersuutsitsinermi tassani, Nunanut allanut ilisimatusarnermullu Naalakkersuisoq Vivian Motzfeldt (S) Kalaallit Nunaata nunataani sakkutooqatigiinnik aalajangersimasumik peqalernissaa pillugu qanoq isumaqarnersoq aperineqarpoq.

Vivian Motzfeldt, Kalaallit Nunaat inuusuillu kalaallit Kalaallit Nunaanni illersornissamut akisussaaffimmik tigusinerusinnaanissaat – assersuutigalugu Kalaallit Nunaanni aallaaveqarlunilu timmisartoqarfimmik kalaallinik sakkutoqatigeeqalernissaa takorloorsinnaaviuk? DR-imeersoq tusagassiortoq aperivoq.

- Inuit tamatumunnga ilaarusuttut namminneq kajuminnermikkut ilaasinnaapput. Nunatta ‘sakkuaaffiunnginnerata’ attatiinnarnissaa uagutsinnut pingaaruteqarnerpaavoq. Kalaallit Nunaat nunanik allanik akerleriissuteqarnikuunngisaannarpoq, tamannalu attatiinnarusoqaarput. Ullumikkulli pissutsit pissutigalugit nunami maani isumannaatsuunissaq qulakkeerniarlugu iliuuseqarnerusariaqarpugut, taanna akivoq.

Kalaallit Nunaata kangiani Rangersit

Kalaallit Nunaanni aalajangersimasumik sakkutooqatigiit pillugit pilersaarutaaratarsinnaasut annerusumik iserfiginngikkaluarai, DR-imit apeqqutigineqartut qallunaat illersornissamut ministeriata oqaaseqaataanut atassuteqartippaattaaq.

Taarsiullugu Kangerlussuarmi Issittumi tunngaviusumik ilinniarfik ‘iluatsilluartutut’, nunap sillimaniarnissaa pineqartillugu, najukkamilu innuttaasut peqataatinneqartarnissaasa pingaaruteqarnera erseqqissaatigaa:

- Tamatuma saniatigut isumaqatigiissutinut nutaanngitsunut tunngatillugu suli naammassinngisaqarpuguttaaq: Kalaallit Nunaata Alapernaatsui, kalaallini inuiaqatigiinni taperseeqataasinnaasunik inunnik amerlanerusunik tikilluaqquserusuppugut, Troels Lund Poulsen oqarpoq.

Kalaallit Nunaata Alapernaatsui amerlanerusunit peqataaffigineqalernissaa politikerinit kissaatigineqartoq 2021-mi pilersinneqarpoq. Alapernaatsut innuttaasuupput sakkutuujunngitsut, nalinginnaanngitsunik navianartunilluunniit pisoqartillugu Issittumi Sakkutooqarfimmut oqarasuaatikkut app-ikkulluunniit nalunaaruteqarsinnaasut.  

- Taakkualu ‘rangersinik pilersaarusiatut’ taagukkatsinni Canadamiunit ilikkagaqarsinnaanerluta misissussavarput. Aamma taamaaliorsinnaasugut isumaqarpunga, tusagassiortunik katersuutsitsinermi Troels Lund Poulsen ilanngussivoq.

KNR-ip qallunaat illersornissamut ministeriat, Kalaallit Nunaata nunataani aalajangersimasumik sakkutooqatigeeqalernissamut isuma pillugu tusagassiortunik katersuutsitsinerup kinguninngua tusarniaaffigaa.

Troels Lund Poulsenilli tamanna itisiliiffigerusunngilaa.

Pilersaarusiaq nutaaq ’Greenland Rangers’ pillugu, Canadami sakkutuujunngitsut ’Canadian Rangers’-init isumassarsiaasoq, taanna oqarpoq:

- Kalaallit Nunaanni avinngarusimanerusunittaaq – nunaqarfiit ilaanni - susoqarneranik malinnaaffiusinnaasumik najuuffiusinnaasoq pineqarpoq. Minnerunngitsumik Kalaallit Nunaata kangiani naleqqulluinnassagaluarpoq.