"Nunatsinni Saamillu Nunaanni inuuneq assersuunneqarsinnaavoq"
Ullumikkut ulloq - sapaat februaarip arfernat - saamit inuiattut ulloraat. Elisabeth Heilmann Blind Sisimiormiuuvoq, Saamimik uilik, Saamillu Nunaanni Sverigimi ukiuni 23-ni najugaqarsimalluni.
- Ullumi illoqarfimmi Jokkmokkimi takusassarsiorpunga. Tassa Jokkmokkimi niuffanneq ukiut tamaasa aaqqissuunneqartartoq sapaatip akunnerani ingerlanneqarami, inuppassuaqarluni, ilaat nipilersortunik oqalugiartunillu tusarnaariartut, ilaat Saamit eqqumiitsuliaannik assassugaannillu saqqummersitanik takuniaasut.
Jokkmokkimi niuffattarneq ukiuni 406-ini ingerlanneqartareerpoq - tassami 1604-mili februaarimi sapaatip akunnerani siullermi ingerlanneqartarami. Inuiattullu ullorsiornerput Saamit ataqatigiinnerannut imminullu tatiginerannut pingaaruteqaqaaq, Elisabeth Heilmann Blind oqarpoq.
Taassuma aamma oqaatigaa Saamit imminnut tatiginerat ukiuni makkunani sakkortusiartuinnartoq.
- Inuiattut ataqatigiinnissaq inuit pingaartilluinnarpaat, ingammik inuusuttut Saamit inuiattut ullorsiornerat pingaartittarpaat. Aamma Kalaallit Nunaannut ataqqinnilluinnartuupput. Nunatsinni Saamillu Nunaanni inuuneq inuusuttut assersuuttarpaat, kulturitoqqallu taakku marluk assigiissuteqarnerartarlugit.
- Maani najugaqarninni kalaaliunera misigilluartarpara, tassami kalaaliunera maani ataqqineqartoq malugisinnaasarakku, Elisabeth Heilmann Blind naggasiivoq, unnummullu inuiattut ullorsiornerminni nerisannaaminnik nerinissani qilanaaralugu, tassaasunik tuttu uuinnagaq uluusiinik tassa multebær-inik kinguleqqiuserlugu.
