Nunatsinni rockimik nipilersornerup pileqqaarfia Nuummi nalliussineqassaaq
Nipilersornermik pikkorissaaneq NUIF-imi nalunaaquttap akunnera ataaseq affarlu tusarnaartitsinermik naggaserneqassaaq tallimanngornermi aggustip qulingiluaani nal. 20.00-21.30, pikkorisaanermilu peqataasut Sumep erinarsuutitoqaannik tusarnaartitsissapput.
Nalunaaquttap akunnerata affaa qaangiutiinnartoq appeqqittoqassaaq, tamatumuuna kulturikkut illorsuarmi Katuami, tassanilu Nunatsinni nipilersortartut pikkorinnerpaartaasa ilaat kalaallit rockimik nipilersortarnerisa pileqqaarfia nalliussillugu tusarnaartitsissapput.
- Inua Music kalaallit rockimik nipilersortarnerisa pileqqaarfia nalliussillugu tusarnaartitsisitsissaaq, Nunatsinnimi rickimik nipilersorneq 'sume-sumut' saqqummersitsisarfik Demos aqqutigalugu 1973 saqqummersinneqartoq tamatuminnga aallarniisuuvoq, Jan Hansen Inua Musicimeersoq taama paasissutissiivoq.
Nalliussineqarnissaalu pissaaq tallimanngornermi aggustip qulingiluaani nal. 22.00-mit 01.00-imut, isernerlu 100 koruuneqassaaq.
Nalliussilluni tusarnaartitsinermi nipilersortussat nipilersortartunik misilittagartuunik katitigaapput:
Martin Zinck, tumerparpaat, Noah Mølgaard, pattagiaq, Jan Hansen, kitaari, Martin Steenholdt, kitaari, Eigil Petersen, kitaari, Malik Andersen, qatitooq, kiisalu Angunnguaq Larsen, kitaari.
Rockimik nipilersortartut Sume, Kalaallit Nunaanni siullersaallutik rockimik nuussualiorput, (L.P-long playing) Sume – Sumut; Demos 13 (1973), nipilersukkanik qulinik imalimmik. Sume-kut kalaallisut taalliortariaatsimikkut nipilersoriartaatsimikkullu aallartitsinerat kalaallinit akorneqarpoq, Jan Hansen Inua Musicimeersoq taama allappoq.
Nipilersukkat taallai qallunaanik isorinnittuupput, inuiaqatigiinnillu pissutsinik oqallisissanik sammisaqartuullutik. Nunatsinni naalakkersuinikkut piorsarsimasutsikkullu pissutsit taallanngorlugit ersersinniarneqarput nuussuarmi LP-imi.
Maqaasinerup iluani ilaquttanut ikinngutinullu, kalaallit Qallunaat Nunaanniittut nunaqqatiminnik katerisimaaqatiginninnissaminnik pingaartitsisupilussuupput. Katerisimaarnerni imminnut susassaqaqatigiillutik naapisimaartarput, Nunatsinni naalakkersuinikkut piorsarsimassutsikkullu pissutsit isumaliutersuutigalugit. Unalu LP ”oqallisissiatut imalinnik taallartaqarpoq”: Inuaqatigiittut sumut killippugut aamma suna siunnerfigaarput? SUME - SUMUT?
