Nunatsinni raajat ikiliartorput

Kinguppaat Nunatsinni 2003-mili ikiliartulerput ullorlu manna tikillugu ikiliartuinnavillutik. Pinngortitaleriffiup uumassuseqartulerisuisa kinguppannik pisassiissutissatut Naalakkersuisunut inassutaanni kingullermi tamanna atuarneqarsinnaavoq. Uumassuseqartulerisut inassutaat malinneqassappat Nunatta kitaata imartaani kinguppaat 80.000 tonsit aappaagu pisassiissutigineqartariaqarput.
Allattoq Karsten Sommer, Knud Reimer
novembarip 07-at 2012 06:22

Ukioq manna kinguppattassiissutit 90.000 tonsiupput, uumassuseqartulerisullu innersuussutaat Naalakkersuisunit malinneqassappata kinguppanniat 10.000 tonsinik aappaagu pisassakinnerussapput, tassalu kinguppaat suli ikiliartuinnarnerannut tamanna takussutissaalluni.

Kinguppaammi misissugarineqartut milliartorput, kinguppaallu suffisartut aatsaat taama ikitsigimmata siunissami aalisarneqarsinnaasut ikilineqartariaqalerput.  Nunatta imartaani saarullinikkiartuinnarnera kinguppaat ikiliartuinnarnerannut aamma pissutaaqataavoq. Saarulliimmi kinguppannik mamarisaqarluinnartuupput, ikiliartuinnarnerinullu sunneeqataalluarmata Pinngortitaleriffiup ikinnerusunik kinguppattassanik innersuussineranik kinguneqartoq, Pinngortitaleriffimmi immikkoortortaqarfimmi pisortaq Helle Siegstad oqarpoq.

2003-p 2012-illu akornanni kinguppaat ikileriarneri malunnaqaat, kinguppaallu avataaniittut ikileriarnersaapput, amerlassusaallu 1990-ikkut naajartornerannut nallersuutilerluni.

90-ikkut naalerneranni kinguppattassat ukiumut 80.000 tonsiupput, tassalu aappaagumut kinguppattassiissutit amerlaqatigiinnarlugit.

Tunup avataanili aappaagumut kinguppattassiissutit nikisinneqassanngillat, tassa ukiumut 12.400 tonsiussagamik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq