Nunatsinni pujortartorujussuuvugut
Nunatsinni pujortartarneq 1950-ikkunniilli ullumimut allannguuteqangaarsimanngilaq, innuttaasut 70 procentii pujortartartuummata, meeqqallu ilaat aqqaneq marlunnilluunniit ukioqaratilli pujortalersarput, naappaassuarmik kræftimik akiuiniaqatigiiffik Danmarkimi Kræftens Bekæmpelse taama allaaserisaqarpoq.
Nunatsinni pujortartartut ima amerlatigaat meeqqat pingajorarterutaat aqqaneq-marlunnilluunniit suli ukioqaleratik pujortartalersarlutik.
Nunatsinni inuusuttuaqqat 14-t 17-illu akornanni ukiullit 42 procentii pujortartartuupput, innuttaasullu 1950-ikkunnisut 70 procentiisa missaat pujortartartuupput, taamanili meeqqat pujortartarnerat aamma takornartaanngilaq.
Tamanna pillugu Kræftens Bekæmpelsemeersut pingasut nunatsinniipput pujortarunnaarnissamut inuusuttuaqqanut pikkorissartitsiartorlutik.
Sisimiuni pinaveersaartitsinermut siunnersorti Âníse Svane Johansen Kræftens Bekæmpelsep internetsikkut nittartakkamini allaaserisami oqarpoq pujortarunnaarniarneq pujortartaqqaalersuni ajornannginnerusartoq, taamaattumillu inuusuttut annermik maanna suliniuteqarfigigitik
Erseqqissaatigaa nunatsinni inuiaqatigiit ikittunnguugatta tupatornerup kingunerisaanik kræftimik toqquteqartartut amerleriassappata tamanna akissaqarfiginngikkipput.
Danmarkimi nappaassuarmut kræftimut akiuiniaqatigiiffiup Kræftens Bekæmpelsep internetsikkut nittartagaanut iserluni nunatsinni pujortarnerujussuaq pillugu allaaserisaq atuarneqarsinnaavoq.
