Nunatsinni politiit ulappupput
Politiit nunarput tamakkerlugu ukiutoqqami ukiortaamilu ulappussimapput. Katillugu 300-iarlutik politiit nalunaarusiortariaqarsimapput.
Angerlarsimaffinni eqqissiviiliornerit politiinit nalunaarsuinermi amerlanerpaasimapput, katillugu 60-eriarluni politiit orniguttariaqarsimammamata, taakkunannga Nuummiinnaq 23-erilarluni angerlarsimaffinni eqqissiviilliortunut orniguttoqartariaqarsimavoq. Nuna tamakkerlugu persuttaanerit aqqanillit aqqusinernilu eqqissiviilliornerit 22-it pisimapput.
Ukiutoqqami ukiortaamilu politiit ulappunnerisa saniatigut, pinngitsaaliinerit allatigullu kinguassiutikkut atornerluisimanerit aamma suliassanut ilaasimapput. Suliat aatsaat aallartinneqarmata politiit oqaatigisinnaanngikkallarpaat qanorpiaq amerlatiginersut suliassanngortinneqarsimanersut, taama vicepolitimesteri Bjørn Bay oqarpoq. Taannali oqarpoq tigusaasut tallimat qulillu akornannik amerlassuseqartut.
Politiit nuna tamakkerlugu ulappussimagaluaqalutik ikuallattoornernik qummoroortartulerinernillu ajutoornernik pinartunik pisoqarsimanngilaq, taamaallaalli ajutoornerit annikitsututut taaneqarsinnaasut pisarsimasut politiit nalunaarput.
