Nunatsinni politiit sipaarfigineqassagunanngillat
Taama isumaqatigiissuteqarnerup kingunerissagunavippaa, Nunatsinni politiit sipaarfigineqassagunannginnissaat, taama neriupput Nunatsinnit folketingimut ilaasortaatitagut marluusut.
- Nunatsinni politiit aningaasanik amerlanernik atugassaqartinneqarnissaat soorunami neriuutigisupilussuuara aamma Kalaallit taama piumasaqarnerat tusaaniarneqassasoq neriuutigaara. Folketingimut ilaasortaq Inuit Ataqatigiinneersoq, Sara Olsvig oqarpoq.
Aningaasat isumaqatigiissutaasut suli Danmarkimi politeeqarfinnut agguaanneqanngillat, taamaakkaluartoq Inatsiseqarnermut ministeriaqarfimmit KNR-imut oqaatigineqarpoq, Kalaallit Nunaanni politeeqarfinnut tapiissutit 2011-misut amerlatigisut 2012-imut aamma tapiissutaagallassasut.
Tapiissutit pillugit isumaqatigiinniarnerup nalaani Kalaallit Nunaanni politiit sipaarfigineqassanngitsut, folketingimut ilaasortaatitatta, Doris Jakobsenip Siumumeersup ilungersuutigisimavaa.
- Inatsiseqarnermut ministerip, Morten Bødskovip isumaqatigiissuteqarnerup kingorna nammineerluni uannut saaffiginninnermini oqaatigaa, Kalaallit Nunaanni politiit sipaarfigineqassappata, Naalagaaffeqatigiinnerup iluani pitsanngorsaanikkut aamma pisariillisaanikkut taamaallaat tamanna pissasoq. Tassa ima paasineqarsinnaalluni aningaasanik sipaarfigineqassanngitsugut taamaallaalli pitsanngorsaanikkut sipaarfigineqassalluta, Doris Jakobsen oqarpoq.
Nunaqarfinni kommunefogedit aningaasarsiaat atugarisaallu pillugit Nunatsinni piffissami kingullermi oqallittoqagaatsiarpoq. Taamalu oqallissimaneq ministerimut, Morten Bødskovimut anngunniarlugu Doris Jakobsenip neriorsuutigaa.
Taassuma oqarnera naapertorlugu, Inatsiseqarnermut ministerip aasaru nammineerluni Nunatsinni pissutsit paasiniaaviginiarpai.
- Kommunefogedit aamma Nunatsinni politiit atugarisaasa pitsanngorsarneqarnissaat eqqarsaatigalugit erseqqissaasarsimavugut, taamaaliorpugut Inatsiseqarnermut ministerip pissutsinut atuuttunut asuliinnaanngitsumik isummernissaa pillugu aamma nammineerluni Nunatsinnut paasisassarsiornissa tunaartaralugu, Doris Jakobsen oqarpoq.
Ministerip Nunatsinnut angalanissaa suli iluamik pilersaarusiorneqarsimanngitsoq, Inatsiseqarnermut ministerip nammineerluni oqaatigaa.