Nunatsinni politeeqarnerup aaqqissuussaanera nutarterneqassaaq

Kalaallit Nunaannii politeeqarneq nunap immikkoortuinut tallimanut siusinnerpaamik aappaagumiit aggulunneqassaaq, qitiusumik pigaartoqarfik Nuummiissalluni, nunatsinnut tamarmut atuuttoq. Soorlu qaanaarmiu politiinut sianerpat, taava oqarasuaat Nuummi pigaartoqarfimmit tiguneqassaaq.
aggustip 13-at 2008 13:58

Kalaallit Nunaanni politeeqarneq nunap immikkoortuinut tallimanut aggulunneqassaaq, qitiusumik pigaartuuffik Nuummi inissinneqarluni nunamut tamarmut atuuttoq, tassami kitaani Nanortalimmiit Upernavimmut, politimester Steen Thomsen radioaviisimut oqarpoq. Aamma aqutsinikkut allannguisoqartussaanerarpaa.

Qitiusumik pigaartoqarfik Nuummiittussaq sukumiisumik ima oqaatigaa:

- Ualikkut sisamaniit ullaakkut arfineq pingasut tungaanut nunatsinni politiinut sianeraanni, illoqarfigisami politiit akisassanngillat Nuummiilli akisoqartassaaq. Tamatumalu qulakkeerniartussaavaa nunatsinni tamarmi assigiissumik politiinit sullinneqarluarneq, politimesteri oqarpoq.

Qaanaamiit sianertoqarpat taava qanoq?

-Pissutsinik allanngornermi malugisaqartoqassanngilaq, tassa politeeqarfinni tamani ulloq unnuarlu politiinik piareersimasoqartuartussaammat, politimester Steen Thomsen, radioaviisimut oqarpoq.

Nunap immikkoortuinut agguluinissap qanoq isikkoqarnissaa suli aalajangivinneqanngilaq. Kisiannili maannakkutut nunatsinni politeeqarfeqarneq ingerlanneqaannassasoq politimesterip aamma oqaatigaa, aamma ima kinguneqartussaanngilaq allannguineq politeeqarnerunermik kinguneqassasoq.

Allannguineq qanoq akeqassanersoq Steen Thomsen-ip oqaatigisinnaannginnerarpaa. Nunatsinni politiit sulinerinut millionit pingasunik kisitsisitallit atorneqartarput.