Nunatsinni piniagassat sunik ajoquteqarpat?

Tamanna Pinngortitaleriffiup avatangiisit pillugit misissueqqissaartarfik, DMU peqatigalugu paasiniarsimavaat.
oktobarip 23-at 2011 09:24

Taakku Avanersuarmi pissutsit pinerullugit piniakkani nappaatit nassaassaasut nalunaarusiarisimavaat assit allaaserisallu atorlugit.

Aammalumi  - immaqa tupaallaatigineqarsinnaanngitsumik - arlalissuusimapput.

Uumasuni allaassutaasinnaasut assersuutigalugu makkuusinnaapput: Qilalukkat marlunnik tuugaallit. Avanersuarmi umimmaat allisoornikunik kukiffallit. Nannut equngasunik qaratserfillit, milattuunillu ameqartut imaluunniit immikkut kukillit. Nannut aarrillu trikinillit aamma takornartaanngillat - trikinit tassaapput qullugissat nannut nukiiniittartut, inunnullu toqussutaasinnaasartut.

Piniakkani nappaatit tassaakkajupput puisit kuppernermik nappaatillit meqqunillu katagaasarnerit, uumasuaraninnerit, orsortatigut simertiternerit kiisalu tartukkut, puatsigut tingutsigullu nappaatit.

Qaanaap eqqaani imaani uumasuni akuutissat allallu akuutissat arrortikkuminaatsut annertuumik aamma nassaassaasarput.

Nalunaarusiaq nutaaq kalaallisut danskisullu naqinneqarsimasoq nittartakkakkut natur.gl-imi atuarneqarsinaallunilu aaneqarsinnaavoq.

Uumasut nappaatillit imaluunniit iloqissersimasut qanoq iganeqarnissaminnut piareersarneqarsinnaanersut nerineqassannginnersulluunniit pillugit Pinngortitaleriffimmit tassani ilitsersuussutigineqarput.

Ilanngullugu Pinngortitaleriffiup nunatsinni piniartut tamaasa kaammattorpai, nalunaarusiami eqqaaneqartut avataasigut, uumasunik allatigut iloqisersimasunik naammattuugaqassagaluarunik imminerminnut aamma saaffiginneqqullugit.

Uumasunik pissusissarinngisaminnik iluseqartunik naammattuuisoqassappat ajornanngippat assitalerlugit Pinngortitaleriffik qarasaasiakkut allalluni imaluunniit oqarasuaatikkut sianerluni attavigineqarsinnaavoq.