Nunatsinni periaaseq Savalimmiormiut ilaarniarpaat
Visit Greenland mapping-projektimik taallugu paasissutissanik katersisarpoq, takornarniat assigiinngitsunut aqqanilinnut agguarneqartarlutik, assersuutigalugu inuilaarsuarmut angalasartut, kulturimut tunngasunik soqutigisallit, takusassarsiorlutillu misigisassarsiortartut.
- Mapping-projekti Atlantikup avannaani nunanit atorneqarsinnaavoq, tamaanga takornarniartartut assigiiaakannertarmata, Visit Faroe Islandsip pisortaa Gudrid Højgaard oqarpoq.
Takornarniat pillugit paasissutissanik nunatsinni katersisarneq Visit Faroe Islandsimit maanna ilaarneqalerpoq.
Mapping-projekti nunani avannarlerni takornarnialerisunit assigiinngitsunit aningaasalersorneqarpoq, takornarniallu pillugit paasissutissanik katersisarnerup Islandimit aamma atorneqalernissaa anguniagalluni.
Visit Greenlandip pisortaa Anders Stenbakken ima oqarpoq:
- Takornarniat Atlantikup avannaanut angalasartut kikkuunersut paaserusupparput, Islandimeersullu amerlanerunissaat kissaatigaarput, taamaalisoqassappalli sunik soqutigisaqarnersut paaseqqaartariaqassavarput, Anders Stenbakken oqarpoq.