Nunatsinni palasit danskinit naammagittarnerupput

Danmarkimi palasit pingasuugaangata ataatsip atorfimminut atatillugu illoqartinneqarnini taamaatitikkusuttarpaa, sapaatinilu sulinngiffeqarnerutitaanissani kissaatigisarlugu. Kristumiut aviisiata palasit 275-it apersoreerlugit aamma paasivaa, qallunaat Danmarkimi palasitut atorfeqartut amerlanersaat pisariaqartinneqartutut misigalutik palasiusartut. Kalaallit palasit qallunaanit naammagittarnerusut, domprovst Emma Balslev isumaqarpoq.

-Kalaallit palaasisa atugaat Danmarkiminngaanniit immaqa sakkortunerujussuugaluarput, taamaattorli imaqa naammagittaalliortunik tusagaqarneq ajorpugut. Nalunngilara ukiuni kingullerni immaqa sisamani anguniarneqarsimasoq, soorlu ukiumut sapaatit arfinillit freertarnissaq. Isumaqatigiissutitut anguniarneqarpoq, massakkullu taanna ingerlateqqissavaat, neriuppunga taanna iluarsiumaartoq.

Emma Balslev aamma oqarpoq, palasit ullumikkut freerfeqalaartartut tassaasut sumiiffinni arlariinnik palaseqarfiusuniittut imaluunniit ajoqimik ikiorteqartut.

Palasit ilagiinni suliaat ullut tamarluinnaasa ingerlattariaqartut soorlu kuisitsinerit, apersortitsinerit, katititsinerit ilisinerillu saniatigut tassaasarput oqaloqatiginninnerit ulluugaluarpat unnuaagaluarpat ingerlanneqartariaqartarput. Aperaarput, taamaappat qallunaat kalaallinit naammagittaannerusimanersut?

-Tassami immaqa qallunaat naammagittaannerusimassapput. Soorlu uagut naammagittarneruvugut atukkatsinni, naak suliagut sakkortusinnaagaluartut. Palasit ikikkatta nunatsinni, illoqarfippassuarni sulisoq ataasiinnaasarpoq, taavalu palasi atorfini tunngavigalugu sukkulluunniit attavigineqartussaasinnaagami taamaattumik palasi freerfeqarpiaavinneq ajorpoq. Domprovst Emma Balslev taama oqarpoq.

Nunatsinni palasitut atorfiit 31-t akornanni atorfiit 24-t inuttaqarput, arfineq-marluk inuttaqanngitsut.