Nunatsinni nukittunerpaaq rekordileerialersoq

Nunatsinni nukittunerpaaq Kim Ujarak Lorentzen ajugaanissamut ilimagisaavoq. Unamminissamulli pissanganarsaataasussamik ilanngussisoqassamaarpoq.

- Kim Ujarak Lorentzenip natermiit kivitsinermi 401 kilo kiveriarniarpaa. Tamanna iluatsissappat – tamanna aamma neriuutigeqaarput – nunarsuarmi nukittunerpaat akornanniilerneranik kinguneqassaaq, unamminissamik aaqqissuisoq Allan Juhl timigissartarfinnik fitnessglinik piginnittuusoq oqarpoq.

AAMMA ATUARUK Nunatsinni angutini nukittunerpaaq Danmarkimi angutit nukittunerpaat pingajorigaat

Natermiit qitip nukii iluaqutigalugit kivissineq nukittuneqqusaannerni unammissutini pikkunarnerpaatut isigineqarpoq. Maannamut nunarsuarmi rekordi tassaavoq 501 kilo tassanngalu kivitsisoq tassaavoq Islandimiu Haftnor Björnsson.

- Kim Ujarak Lorentzenip 401 kilomik kivitseriarnini iluatsissaguniuk nunani tamalaani unammisaqattaartalernissamut imminut aqqutissiutissaaq, Allan Juhl naqissusiivoq.

Danmarkimi nukittuneqqusaannermi Kim Ujarak Lorentzenip pingajuattut inissinnera periarfissanik ammaavoq tassami corona pissutigalugu matooraanerit sioqqullugit nunanut allanut arlaleriarluni qaaqquneqartarpoq.

Oqimaassutsit arlariit

Nunatsinni nukittuneqqusaalluni unammisoqalerpat peqataasut oqimaassutsinut assigiinngitsinut pingasunut avinneqassapput.

Unammisitsinissami aporfiit oqimaannerit ilagaat corona.

- Inussivimmi inuit 1.400-ut isersimasinnaagaluarput pissutsit naliginnaasumik ingerlasuuppata. Inuilli katersorsinnaanerat pillugu maanna malittarisassat atuuttut pissutigalugit amerlanerpaamik inuit 100-ut isersimasinnaapput, tamannalu malittariaqarparput, Allan Juhl oqarpoq.

- KNR suleqatigalugu unammineq toqqaannartumik aallakaatinneqassaaq. Inussivimmi inuit isersimasinnaasut killeqassapput aammalu qanillinaversaarnissamut inassuteqaatit malillugit isiginnaartut inissaat agguataarneqassallutik, Allan Juhl nassuiaavoq.

Taamaakkaluartoq sumiiffinnit allaniit peqataaniartut mattunneqassanngillat.

- Mumillugu eqqarsaateqarpugut: ornigussinnaanngippata uagut ornissavagut, Allan Juhl oqarpoq.

- Nammineerluta ornigutinngikkaluarluta sumiiffiit peqataatitaqartut namminneq assiliisoqassapput perialerneranni assiliisartussanik. Inuit katersorsinnaanerannut malittarisassat malissavagut taamaattoq sineriammiit peqataasoqarsinnaatitsilluta, Allan Juhl oqarpoq.

Unammineq Inussivimmi oktoberip 24-at pissaaq.