Nunatsinni niuernermik ilinniarfiit Wæverip Qaqortumut katersorusuppai
Ilinniartitsisoqarnikkut nukissat sumiiffimmut ataatsimut katersoqarneqarnissaat borgmesterip iluaqutissartaqarsiunnaasoraa, tamatumalu nunatsinni niuernermik ilinniarfiit annersaanni pinissaa pissusissamisoorsoralugu. Qaqortumi ilinniarfik 230-nik ilinniatoqarpoq, Nuummilu ilinniarfik 130-inik ilinniartoqarluni.
-Qaqortumi Kujataani Ilinniarnertuunngorniarfik aammalu Niuernermik Ilinniarfik Namminersorlutik Oqartussaniit kattunneqareerput ilinniartitsisoqarnikkut nukissat atorluarumalugit aammalu assigiinngitsunik ilinniagallit amerlanerusut ataatsimoorfeqarnissaat tamatumuunakkut anguniarlugu. Nuummi niuernermik ilinniarfiup ingerlataasa ilanngunneqarnerat Namminersorlutik Oqartussat anguniagaannut ajunngitsunut suli qanilleriarnerussaaq, borgmesteri oqarpoq.
Wæver oqarpoq ilinniarfiit katunneqarnerisigut aamma Naalakkersuisut sanaartornermut aningaasaliissutinik suliffeqarfinnillu sinerissamut siammarterinissamik politikkiannik qineqqusaarnerminnilu neriorsuutaannik pissusissamisuuginnartumik piviusunngortitsinerussasoq. Borgmesterip isumaginninnikkut ilinniarfiit Ilulissanut katersorneqarsimanerat aammalu ilinniarfiit sanaartornermut tunngasut Sisimiunut katersorneqarsimanerat innersuussutigaa.
-Taamaammat ilinniartut iluaqutissaannik nukiit kattullugit pitsaanerpaamik atuagassaqartitsiumalluta ilinniartitaanerit aalajangersimasut katersorneqarnissaannut ataatsimoorniarta. Niuernermik Ilinniarfiup ingerlataannik tamanik Qaqortumut eqiterinikkut ilinniartut inissaannik pinngitsoornani pisariaqartitsisoqalertussaammat Kommune tamatumani aaqqeeqataanissaminut piareersimassaaq, Jørgen Wæver Johansen, Siumut sinnerlugu Kommuni Kujallermi borgmesteriusoq oqarpoq.
