Nunatsinni nipisaat amerlassusaat Pinngortitaleriffimmit ilisimaneqaqqissaanngillat

Nipisaat MSC-mik meqqeqalernerinut atatillugu, Pinngortitaleriffimmi ilisimatuut tamassumunnga siunnersuipput nipisaallu Nunatsinni amerlassusaat nakkutigineqarlutik. Nipisaalli Nunatta imartaani amerlassusaat ilisimaneqaqqissaanngitsut, Pinngortitaleriffimmit oqaatigineqarpoq.
Nipitsat Assi © : Grethe Olsen, Akunnaaq
aggustip 24-at 2015 18:00

Nipisaat Nunatta kitaani upernaakkut taamaallaat suffisartut maanna MSC-mik meqqeqalernerisigut nungusaataanngitsumik piniagaasutut taaneqarsinnaanngorput.

Nipisaat MSC-mik meqqeqalernissaannik Pinngortitaleriffimmi ilisimatuut siunnersuisuupput. Nipisaallu meqqeqalernerisigut tamanna nipisaat Nutta kitaaniittut amerlassusaannut sunniuteqassanersoq ilisimatuunit oqaaseqarfigineqarusunngitsoq, Pinngortitaleriffimmi ilisimatooq, Rasmus Berg Hedeholm oqarpoq.

- Nipisaat MSC-mik meqqeqalernissaat pillugu suliniuteqarnermi sumiiffinni ingerlatsivinni tamassuma pitsaasumik ingerlanneqarnissaa pilersaarusiorluarneqarpoq. Taakkunanngalu siunnersuutit malinneqarpata ingerlatsineq pitsaasumik aamma anguneqassaaq. Nipisaalli MSC-mik meqqeqalernerinut atatillugu tamassuma iluaqutaasinnaaneranut isummersinnaanngilagut tassami siunnersortaaginnaratta.

Aamma atuaruk MSC-mik uppernarsaateqalerneq aalisarnermut pingaaruteqarpoq

Rasmus Berg Hedeholm oqarpoq nassuerutigalugulu Nunatta sineriaani nipisaat amerlassusaat suli ilisimaneqanngimmat.

- Kalaallit Nunaata kitaani nipisaat qanoq amerlassuseqartarnersut oqaatigisinnaanngilarput. Tassami pisarisaasartut tunineqartartullu amerlassusaat naapertorlugit taamaallaat siunnersuivugut. Kisianni tassa nipisaat ullummikkut amerliartornersut ikiliartornersulluunniit malinnaavigeqqissaarniarsaraarput.

Pinngortitaleriffimmi ilisimatooq, Rasmus Berg Hedeholm oqarpoq naqissuserlugulu, nipisaat Nunatsinni nungusaataanngitsumik maannamut piniagaammata.

Aamma atuaruk Nipisat MSC-mik meqqeqalerput

Nipisaat MSC-mik meqqeqalerneri, Pinngortitaq pillugu nunarsuaq tamakkerlugu suliniaqatigiiffimmit WWF-imit nuannaarutigineqartoq, suliniaqatigiiffimmi generalsekretæri, Gitte Seeberg oqarpoq. Aammattaaq nipisaat meqqilerneqarneranni piniagaapilunneqannginnissaat anguneqartussaasoq soorlu Nunatsinni raajaat taama pineqartut oqaatigaa. Gitte Seebergip neriuutigaa, qalerallit MSC-mik meqqeqalernissaannik suliniuteqarneq maanna tullinnguunneqassasoq.