Nunatsinni NGO-t suleqatigiit siullersaat pilersinneqarpoq
Aallarniinissamik suliniuteqartut naalakkersuinikkut suliniuteqanngitsunik allanik suleqateqarnissaminnik kissaateqarput.
Kattuffiit suleqatigiittut inissillutik suliniuteqartut aatsitassarsiornermi innuttaasut pitsaanerusumik peqataatinneqarnissaat sulissutiginiarpaat.
Tamanna pisariaqartinneqartoq suliniuteqartut isumaqarput.
- Ukiuni makkunani qinikkatta aalajangiisarneranni, siusissukkut, paasissutissiilluarluarneq tunngavigalugu naammaginartumillu inuiaqatigiit peqataatinneqarnissaat, illuatungiliuttut sulinerminni siunertarissavaat. Aalajangiinerimmi innuttaasunut, inuiaqatigiinnut kiisalu avatangiisinut, siunissami kinguaariit amerlasuut inuuneranni annertuumik sunniuteqartussaapput, Steen Jeppson, ICC Kalaallit Nunaat sinnerlugu suliniummi pisortaq oqarpoq.
Suleqatigiinnik pilersitsiniarlutik Nuummi oktobarip 14-ianni ataatsimiissapput, soqutiginnittullu ICC-p allaffianut, Nuummi Issortarfimmut 7b-miittumut ualikkut nalunaaqutaq tallimanut qiteqquppat tikilluaqquneqarput.
- Ilisimasanik isummanillu paarlaateqatigiittarfimmik kiisalu tunngavilersorluakkamik oqallittarfimmik pilersitsinissap pilersaarutiginerata saniatigut, aamma pilersaarutigineqarpoq, illuatungiliuttut nutaat innuttaasut pitsaanersusumik peqataatinneqartarnissaannut periutsit inerisarnissaat pillugu Namminersorlutik Oqartussanik oqaloqateqartarnissaat. Tamatuma kinguneranik innuttaasut peqataatinneqarnissaminnut pisinnaatitaaffiisa inatsisitigut naqissuserneqarnissaat kissaatiginarpoq, Anders Meilvang, Transparency International Greenland-imeersoq oqarpoq.
