Nunatsinni nassaat qaratsap allanngoriartornera pillugu immikkuullarissunik paasisaqarfigineqartut
Uumasut affassaasallit qarasaat uagut qarasatsitulli pingasunik immikkoortoqarpoq, taamaammat uumasut qimerlullit affassaasallillu ataatsimoortumik siuaasaat aamma pingasunik immikkoortulimmik qarasaqarnersoq uumassusillit ineriartornerinik ilisimatusartut isumaliutigisimavaat.
Nunattali avannaarsuani Siriuspassetimi nassaat misissuiffigineqarnerat naapertorlugu qarasaq pingasunik immikkoortulik marloriarluni pinngorsimarpasippoq.
»Oqarsinnaalerpugut uumasut qimerlullit affassaasallillu qarasaat pingasunik immikkoortullit imminnut attuumassuteqanngitsumik pinngorsimasut,« palæontologi Danmarkimeersoq Jakob Vinther, Tuluit Nunaanni Bristol Universitymi ilisimatusartoq ilisimatusaatigineqartumilu allaaserinneqataasoq taama oqarpoq.
Kerygmachela uumasuuvoq ilisimatusartunut takornartaanngitsoq, nassaalli nutaat immikkuullarissutigisaat tassaavoq ujarannguunnikut ima innarlerneqarsimanngitsigimmata, allaat isaat, timaasa atortui qarasaallu takuneqarsinnaallutik.
»Tamannalu pissanganarluinnarpoq, taamaalillutami ineriartornerup oqaluttuassartaani akissutissarsineqarsinnaanngitsut akissutissarsisinnaalerpagut, qaratsallu qanoq pinngorsimanera paasisinnaanerlugu, aamma ineriartorneq qanoq ingerlasimanersoq takusinnaavarput,« uumasut qimerlullit ineriartornerat pillugu immikkut ilisimasalik, lektor Jørgen Olesen, Danmarkimi naalagaaffiup pinngortitaq pillugu katersugaasiviani atorfeqartoq ilisimatusaammullu peqataasimanngitsoq taama oqarpoq.
Ujarannguunnikut ukiunik 520 millionit missaannik pisoqaassuseqarput, takuneqarsinnaavorlu uumasoq centimeterit arfineq-marluk missaannik takissusseqartoq, ammaloqisaartoq ataatungimigullu ammalortumik qanilik.
