Nunatsinni nannut pillugit periusissiat siullersaat suliarineqaleruttorpoq

Periusissiaq issittumi nunat nanoqarfiusut nannut pillugit ataatsimoorussamik periusissiassaannik tunngaveqassaaq.

Ataatsimoorussamik periusissiortoqarnissaa Nunavummi Iqalunni 2009-mi ataatsimiittoqarnerani isumaqatigiissutigineqarpoq. Sumi nanoqarnera sutigullu aarlerinartorsiortinneqarnerinik erseqqissumik paasisaqarnissaq siunertaralugu taamatut pilersaarusiortoqarpoq. Taamanilu isumaqatigiissuteqartut tassaapput Kalaallit Nunaat, Canada, USA, Rusland aamma Norge.

Nunalli nanoqarfiusut ilaanni nannunniarneq inerteqqutigineqarpoq. Taamaammat nunani ataasiakkaani immikkut pilersaarusiortoqarnissaa pisariaqarpoq.

Nannut inoqarfinnut qanillattornissaat pinaveersaartinniarlugu siunissami qanoq iliortoqarsinnaaneranut innuttaasut siunnersuuteqartillugit peqataatinneqarnissaat kissaatigineqartoq naalakkersuisoqarfimmit ilisimatitsissutigineqarpoq.

Ilisimatuut Pinngortitaleriffimmeersut Canadami suleqatitik peqatigalugit Kane Basinimi Baffinillu kangerliumarngani nannunik maanna kisitsipput. Kisitsinerup ukiup ingerlanerani naammassineqarnissaa naatsorsuutigineqarpoq, nannunullu tunngatillugu kaammattuuteqarnissami nutaami kisitsinerup inernera atorneqassaaq. Aammattaaq Tunumi nannut ukiuni aggersuni kisinneqartussaassapput.

Nannut Kitaata sineriaaniittut 4000-it 5000-illu akornanniinnissaat ilimagineqarpoq, kisitsinermilu angusaagallartut takutippaat nannut ikileriarsimasut.