Nunatsinni nannut ulorianartorsiortitsisut taamaallaat toqunneqarsinnaapput. 2007-imiilli nannut 79-it toqunneqarsimapput.(Toqqorsivimmit asit)Assi: Nick Cobbing/Ritzau Scanpix

Nunatsinni nannut 79-it 2007-imiilli toqunneqarsimasut

Nunatsinni nannut inunnut ulorianartorsiortitsisut kisimik toqunneqaqqusaapput. Ukiut 14-it ingerlaneranni nannut 79-it toqunneqarnikuupput.

Nunatsinni nannut 79-it imminut illersornikkut 2007-imi toqunneqarsimapput.

Aalisarnermut Piniarnermullu Naalakkersuisoqarfiup kisitsisaataasa tamanna takutikkaa, Sermitsiaq.AG allappoq.

Nunatsinni imminut illersorniarluni nannunik toqutsisinnanermut sukangasuunik inatsiseqarpoq, inuullu inuuneranik navianartorsiortitsippata toqunneqarsinnaallutik.

2017-imi nannut 16-it navianartorsiortitsineratigut toqunneqarput, 2007-imiilli nannut katillugit 79-it inuup inuuneranik navianartorsiortsitsineratigut toqunneqarput.

Nannut taakku inunnik ulorianartorsiortitsisimasut inuulli inuuneranik naleqanngitsumik ulorianartorsirtitsisimasut, Sermitsiaq allappoq.

Norgemi Svalbardimi tammaarsimaartarfimmi Longyearbyenimi angut nannumit siorna aggustimi toqutaavoq.

Nanoq illoqarfiup mittarfiata eqqaani tammaarsimaarfimmi toqungasoq kingorna nassaarineqarpoq.

AAMMA ATUARUK Angut tammaarsimaarfimmi nannumit saassunneqarluni toqutaasoq

Issittumi nannut katillugit 20.000-it 25.000-illu akornanniittut Pinngortitaleriffiup nalunaarsorsimavai.

Nannut nunatta kitaani tunumilu takussaanerupput.

Nunarsuaq tamakkerlugu pinngortitaq illersorniarlugu suliniaqatigiiffiup IUCN-ip oqanera naapertorlugu nannut mianerisassatut allattorsimaffimmi nalunaarsorsimapput.

IUCN-ip immap sikuerukkiartornera nannut uumaniarnerannut aarlerinarnerpaatut isigaa.

Nannut qanillattornissaat, malersornissaat arlaatigulluunniit akornusersorneqarnissaat inerteqqutaavoq.

- Nannut inunnik, uumasuutinik, atortunik, illunik il.il. ulorianartorsiortitsisinnaapput. Saassunneqaataasinnaasumik iliuuseqartoqassanngilaq.

- Misigisassarsiorusunneq nannunilluunniit assileerusunneq ilinnik, allanik nannunilluunniit ajornartorsiortitsissanngilaq, Aalisarnermut, Piniarnermut, Nunalerinermullu Naalakkersuisoqarfik nittartakkami allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl