Nunatsinni naligiissitaanerunissaq oqallisaajuartariaqarsoraa
Naligiissitaanerup Ulluanik taallugu Nunatsinni naligiissitaanerunissap malunnartinniarneqartarnissaa pillugu, Naligiissitaanermut Siunnersuisoqatigiit siulittasuat Poul Hansen ima oqarpoq:
- Naligiissitaanerup Ullua pingaaruteqartipparput pissutigalugu assigiinngitsutigut taassuma angujartuaarnerani aporfiusarsimasut eqqaaniaratsigit. Naligiissitaanerup Ullua atorlugu aamma oqallilluartoqartarpoq, oqallitsitsinerit aqqutigalugit. Aamma aaqqissuussinerit assigiinngitsut piareersaalluarnikkut assigiinngitsutigut malunnartinniarneqarsinnaammata ulloq taanna pingaartipparput, Naligiissitaanermut Siunnersuisoqatigiit siulittaasuat Poul Hansen oqarpoq.
Arnat angutillu akissarsiaasa naligiinnerulernissaat sulissutiginiarneqartariaqartoq taassuma aamma oqaatigaa, Nunatsinnili naligiissitaanerunissaq pillugu suliniuteqarnermi suna pingaarnerpaanersoq aamma aperaarput, arnanillu persuttaasarnerup akiorniarneqarnissaa pingaarnernut ilaasoq oqarpoq.
Paarisa, 8. marts Gruppen, pinaveersaartitsinermullu siunnersuisoqarfimminngaanniit peqataasoqarluni aamma peqataarusuttunik allanik peqataasoqarluni suleqatigiissitaliortoqarnikuuvoq, arnanik persuttasarnerup akiorniarneqarnissaa qitiulluni. Tamanna pillugu DVD-mik saqqummersitsisoqassamaartoq, Poul Hansenip oqaatigaa:
- DVD-liornissatsinnut piareersaavugut, aamma qanittukkut misissuisitsivugut, eqqaamasakka malillugit februaarimi saqqummiunneqartunik. Arnat angutillu akissarsiaat 33 procentit tikillugit nikingassuteqartut misissuinermi tassani paasineqarpoq. Aningaasarsianut tunngassuteqartunut isumaqatigiissutigineqartartut suliassatsinnut pingaaruteqartut misissuinerup takutippaa. Akissarsiat assigiinngissappata taava uagutsinnut suliakkiissutigineqassaaq, sulisitsisut inatsisit malillugit akissarsiaqartitsisarnissaat taamaalilluni pingaaruteqartinneqarluni uagutsinnut sakkussaalluarniassammat, Naligiissitaanermut Siunnersuisoqatigiinni siulittaasoq Poul Hansen oqarpoq.
Naligiissitaanerup Ullua aappaagu malunnartinniarneqalerpat suna imaluunniit suut qulequtaassanersut suli aalajangerneqanngillat, Poul Hansenilli oqaatigaa siunnersuisoqatigiinni ataatsimiissutigineqarumaartoq, ukioq mannalu suut iluatsiffiusimanersut iluatsiffiuallaarsimannginnersullu aamma nalilerneqarumaarlutik.
