Nunatsinni naartuersittarnerit affaannanngortinneqarnissaat naalakkersuisut anguniagaraat, anguneqarsimanngilarli.
Naartuersittarnerit inunngorsimasunit siorna amerlanerusimapput, ukiullu pingajussaa taamaalluni.
- Naartunaveersaarnissaq pillugu qanoq iliuuseqartoqartassanersoq inuit ilisimavaat. Naartuersittarnerli pillugu inuit isumaat allanngortittariaqarpoq, Bodil Karlshøj Poulsen, PAARISA-meersoq, Kristeligt Dagblad-imut taama oqarpoq.
2003-mi naartuersittut nunatsinni 869-iusimapput, siornalu 867-iusimallutik. Nunap inuttussusaanut naleqqiutissagaanni Kalaallit Nunaanni naartuersittartut nunanut allanut sanilliullugu amerlanerpaanut ilaapput, tassa Ruslandimi, Rumaaniami aamma Bulgariami naartuersittartut amerlanerpaajummata.
Statens Institut for Folkesundhed-imi professori Peter Bjerregaard, kalaallillu peqqissusaannik misissuisoq, oqarpoq, naartuersittartut amerlanerannut ataatsimik marlunnilluunniit nassuiaatissaqartoq.
Tassa Danmarkimi naartuersinnissamut inerteqquteqannginneq, nunatsinnilu kinguaassiuuutit atornerannut inuit isumaat naartuersinnerpassuarnut pissutaasinnaasut Peter Bjerregaardip oqaatigaa.