Nunatsinni mittarfeqarfiit nutaamik aaqqissuussivigineqalersut

Mittarfiit 13-it Mittarfeqarfinnit ingerlanneqartut aaqqissuussaanermut nutaamut ingerlaannaq atuutilersumik ilanngutitinneqassapput. Taarsiullugu mittarfeqarfiit allaffissornikkut aqunneqarnerat nunap immikkoortukkuutaaraluni immikkoortiterneqartussanngorpoq, aammalu angissutsiminnut mittarfeqarfiullu suussusaanut immikkoortitigaalissallutik. Mittarfeqarfiit immikkoortut tallimat aallaavigalugit aqunneqalissapput. Kangerlussuarmi Narsarsuarmilu mittarfeqarfiit anginerunertik pissutigalugu nammineq allaffissornikkut aqutsiveqassapput. Tamakku saniatigut allaffissornikkut immikkoortortat pingasut pilersinneqassapput; anginerit, akunnattumik angissusillit mittarfiillu ujaraaqqanik qallikkat.
Allattoq Peter Troelsen, Simon Uldum
marsip 25-at 2013 13:00

Taamatut immikkoortiterinitsigut allaffissorneq pisariaqanngitsoq aamma atorunnaarsissavarput. Mittarfiit nammineq aalajangiisinnaassuseqarnerulissapput, suliffeqarfiullu sinnera mittarfinni ingerlatsinermut kiffartuussisutut annerusumik inissisimalissalluni, pisortaaneq Jens Lauridsen allannguutit pillugit oqarpoq.

Allannguutit nutaat aningaasaqarnikkut maannakkorpiaq atugassarititaasunut naleqqussarnermut atatillugu pinerat naqissuserpaa, niuerfiit pingaarnerit akilersinnaassuserlu pingaarnerutinneqassapput. Tamanna mittarfiit allaffissornikkut immikkoortunut ataffigisaannut katersornerisigut pitsaanerpaamik anguneqarsinnaavoq.

Suliffeqarfitsinni naleqalersitsisussat pimoorullugit sammissavagut - tassalu mittarfeqarfinnik ingerlatsineq. Kalaallit Nunaanni suliffeqarfiit anginerit ilaattut aamma inuiaqatigiinni ineriartortitsinissamut akisussaaqataanissarput suliassatut isigaarput. Pitsaasumik patajaatsumillu tunngavissiinikkut siunissamilu unamminartussanut piareersakkatigut tamanna angusinnaavarput, Jens Lauridsen oqarpoq, Nunatsinnilu mittarfinnut angallassinerit ukiuni aggersuni amerliapiloornissaat naatsorsuutigineqartoq innersuussutigalugu.

Mittarfeqarfiit ukiorpassuarni nutaanik aningaasaliisimanngillat, aaqqissuussaanikkullu allannguuteqartitsisoqarnera taamatut inissisimalersimanerup toqqaannartumik kingunerivaa.

Aningaasaqarnikkut inissisimanerput nunatta sinnerani aningaasaqarnermut atassuteqarluinnartuuvoq. Namminersorlutik Oqartussanit amerlanerusunik aningaasaliiffigineqarnissarput naatsorsuutigisinnaanngilarput, taamaammat nammineq aningaasaqarnitsinnut akisussaaffeqarnerulertariaqarpugut. Tamannalumi aaqqissuussaanerup nutaamik ilusilerneqarnerani siunertaavoq, tassalu aningaasaqarnermut akisussaaffiup suliffeqarfimmut tamarmut agguataarnissaa, Jens Lauridsen oqarpoq.
 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq