Nunatsinni mingutsinneqarsimasumik minguinnerpaamillu imeqarpoq

Ilisimatuut arlallit maanna Sisimiuniittut taama oqarput. Bakterianut akiuussutissap, antibiotikap, sinnikorisimasai avatangiisinut qanoq sunniuteqartarnersut taakku misissorpaat. Erngup Kalaallit Nunaanni minguissusaata taama assigiinngitsiginera pissutigalugu ilisimatuut Kalaallit Nunaanniinnerat tulluartorujussuuvoq, ilisimatuut ilaat, Maria Granberg, misissueqataasoq, oqarpoq.

Erngup maangaannartup imaanut siaruaatinnginnerani salinneqartannginnera pissutigalugu, Kalaallit Nunaanni sumiiffinni assigiinngitsuni mingulimmik imeqarfiusuni, imerlu minguitsoq, ilisimatuut taamaalillutik sanilliussinnaavaat.

Bakterianut akiuussutissap, antibiotikap, uumasunut inunnullu iitinneqanngikkuni kapuutigineqartartup, 30- 40 procentia timimut akuliutinngitsoortarpoq, imermut maangaannartumut taamaalilluni akuliuttarluni. Tamanna pinngortitami uumasunut bakterianullu ajornartorsiortitsilersinnaavoq, taakkulu nakorsaammut akiuussinnaanngorsinnaallutik.

- Bakterianut akiuussutissaq pinngortitamut qanoq sunniuttarnersoq ilisimasaqarfigivallaanngilarput, aamma akiuussutissamut tassunga akiuussinnaaneq qanoq siaruaatsigisarnersoq nalullutigu. Pinngortamut inunnullu navianartorsiortitsilissanngippat tamatumunnga ilisimasaqalernissaq pingaaruteqarpoq, Maria Granberg oqarpoq.

Sverigemi Göteborgimi Universiteti, Artekilu Sisimiuniittoq suleqatigiillutik misissuipput.