Kalaallit Nunaanni aasaanerani isikkamik arsarnermik meeqqat sungiusartinneqartarneri ukioq manna illoqarfinni assigiinngitsorpassuarni, katillugu meeqqanik 1000-it sinneqartunik peqataaffigineqassaaq.
Nuummi meeqqat tallimaniit 15-inut ukiullit ulluni makkunani isikkamik arsarnermik sungiusartinneqarput, aaqqissueqataasorlu, Rene Olsen, Pikkori Sportimeersoq oqarpoq, Nuummiuaqqat 135-it sinnerlugit ilaaniarlutik allatsisimasut.
Taamatullu aaqqissuussinermi aningaasaliisooqataapput, Brugsen, Coca Cola, timerosortartunullu atisaliortartut Umbro, kiisalu, Royal Arctic Line. Nuummiuaqqat sungiusarneranni aningaasat 35.000 koruunit atorneqarput. Aasaaneranilu fodboldskolertitsinissani kommunit peqataalluartut GBU allappoq.
Illoqarfiit aasaanerani fodboldskolertitsisussat makkuupput: Sisimiut, Qaqortoq, Narsaq, Ammassalik, Qasigiannguit, Uummannaq, Nanortalik, Kangaatsiaq, Upernavik, Aasiaat, Qeqertarsuaq, Paamiut, Ilulissat kiisalu Maniitsoq. Qaanaami aasaanerani fodboldskolertitsisoqarnissaanik aamma pilersaaruteqartoqarpoq.
