Nunatsinni matoqqasumik parnaarussiviliornissaq nukingernartoq
Herstedvesterimi kalaallit sivisussusiligaanngitsumik parnaarussat aaqqissuteqarfiginissaanut Danmarkimi nunatsinnilu naalakkersuisut iliuuseqartariaqalersut, Folketingimi ilaasortaq IA-meersoq Kuupik Kleist isumaqarpoq.
Kuupik Kleisti nunatsinni matoqqasumik parnaarussiveqalernissanik siunertaqarluni, inatsisissamik Folketingimut siunnersuuteqalersaarpoq.
Inatsiseqarnermut oqartussaaffik nunatsinni suli akisussaafigineqanngimmat matoqqasumik parnaarussiviliornissaq naalagaaffiup akilertariaqaraa, taamaaliornissarlu ajornaquteqarnavianngitsoq, Kuupik Kleist isumaqarpoq.
- Herstedvesterimut parnaarussuiinnarnerup aaqqiviginiarneqarnera utaqqiinnarneqarsinnaangilaq, Kuupik Klesit oqarpoq.
Kuupik Kleistip siunnersuutiginiarpaa nunatsinni matoqqasumik parnaarussiviliornissap sulissutiginissaanut nunarput Danmarkilu isumaqatigiissuteqartariaqartut.
Matoqqasumik parnaarussiviliornissaq eqqartuussiveqarneq pillugu ataatsimiititaliarsuup nalunaarusioreerluni, siorna inassutaasa ilagaat.
Namminersorneq pillugu pisortaqarfik eqqartuussiveqarneq pillugu ataatsimiititaliarsuup nalunaarusiai pillugit ullut marluk Nuummi maji aallartilaarpat isumasioqatigiissitsiniarpoq.
