Atuagassiaq Kalaalermi siulersuisut: Aaqqissuisoq Hans Anthon Lynge (saamerleq), siulersuisuni ilaasortaq Cecilie Vahl, siulittaasoq Aqqaluk Lynge ataqqinaammik ilaasortaq Karl-Elias Olsen. Assi: Kalaaleq

Nunatsinni kulturikkut sunniutilik 75-iliisoq: Nuanneqaaq

Atuakkiortoq Hans Anthon Lynge sisamanngormat 75-iliivoq. Hanseeraq nunatsinnut pingaaruteqartorujussuuvoq, atuakkiortoq taalliortorlu Aqqaluk Lynge inuuissiortoq pillugu taama oqarpoq.

Atuakkiortuuvoq, ilinniartitsisoq, nuterserisoq nunattalu oqaluttuarisaaneranut pingaarutilik.

Hans Anthon Lynge, Hanseeraq, sisamanngormat 75-iliivoq.

- Misigissuseq ajunngilaq, ajunngitsutut misigisimagama annerusumik eqqarsaatinniitinngilara, inuuissiortoq oqarpoq. Ilaquttani qanigisanilu ilagalugit ullorsiorluni oqaatigaa.

Hans Anthon Lynge nunatsinni atuakkiortut peqatigiiffiani 1980-imit 1984-mut kiisalu 1987-imit 1995-imut siulittaasuuvoq. Ilinniarfissuarmilu lektoriunikuulluni.

Atuakkiortuuvoq, 1970-imilu siullermeerluni atuakkamik saqqummersitsilluni. Taamanikkulli oqaluttualianik, taallanik allanillu saqqummersitsisarluni.

Umiarsuup Tikinngilaattaani

Atuakkiani "Umiarsuup Tikinngilaattaani" ilaatigut tusaamaneqaatigaa.

Taalliortoq atuakkiortorlu Aqqaluk Lynge naapertorlugu Hans Anthon Lyngep suliai immikkuullarissuupput.

Hans Antohn Lynge pillugu:
Qullissani 1945-imi inunngorpoq.Namminersorlutik Oqartussat Atuartitsinermut kultureqarnermullu immikkoortortaqarfiani 1981-imit 1997-mut siunnersortitut sulinikuuvoq. 

Atuakkiai:

- Seqajuk (1976)
- Umiarsuup tikinngilaattaani (1982, qallunaatut 1997-imi saqqummersoq)
- Allaqqitat (1997, qallunaatut: 1998)
- Digtsamlingen Nunanni avani (1990, qallunaatut: 1991).

Nunanit avannarlernit atuakkiat arlallit kalaallisuunngortinnikuuai.

Najoqqutaq: Den store danske

- Atuakkiaani siullermi "Umiarsuup tikinngilaattaani" nuannersumik nunaqarfimmi pisuni sorpassuit aallaavigalugit inuunerup taamanikkut ingerlaasia nuannersorujummik oqaluttuarivaa, Aqqaluk Lynge oqarpoq. Taakku ukiorpassuarni suleqatigiinnikuupput, ilaatigut atuagassiami Kalaalermi suleqatigiillutik.

Aqqaluk Lyngelu naapertorlugu Hanseeraq nunatsinnut pingaaruteqarluinnarpoq.

- Hanseeqqap inuiaqatigiinnut tunniussai annertoorujussuupput. Ilinniartitsinikkut atuakkiornermigut oqaluttuarisaaneq pillugu nutsigarpassuarmigut atuagassaqartittuarsimavaatigut. Tassuunakkut Hanseeraq pingaaruteqartorujussuuvoq.

Hans Anthon Lynge aperaarput suliamini sorliit pingaaruteqarnerpaatut oqaatigisinnanerai. 

Qaamarngup Uummataa

- Pingaartitakka amerlangaarmata imatut pingaarnerpaamik oqarnissamut tunuarsimaarpunga.

Suliaali ataaseq immikkuullarilluinnarpoq.

Hanseeqqap ilitsersuisoq Jacob Grønlykke peqatigalugu isiginnaagassiaq "Qaamarngup Uummataa" suleqataaffiginikuaa.

- Taassuma suleqataaffiginera nuannersuuvoq kisianni sivisungaatsiarlunga, filmiliatut takorluugaagami. Sivisugaluarluni suliaavoq inernera eqqarsaatigilerlugu aamma ajorpallaanngitsutut taaneqarsinnaasoq.

Hans Anthon Lynge atuagassiami Kalaalermi aaqqissuisuuvoq. Atuagassiaq nunatta oqaluttuarisaaneranut, taallanut atuakkianullu ilaatgut imaqartoq.

Tassanilu suli aaqqissuisuugallarnissani naatsorsuutigalugu oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat