Nunatsinni Kommuneqarfik Sermersooq ingerlarsortitsivoq
Kommuneqarfik Sermersooq nunarput tamaat isigalugu aningaasaqarnermut iluaqutaavoq, naak missingersuutini, kommunalbestyrelsemit ippassaq akuerineqartuni, 70 millioni koruunit sinnilaarlugit aappaagumut amigartooruteqartussatut missingersuusioraluarluni.
Kommuneqarfik Sermersuup aappaagumut kaaviiaartitassarai aningaasat 1,4 milliardi koruunit. Amigartoorutissat 70 millioni koruunit sinneqalaartut, kommunip tigoriaannarnik aningaasaataanit 194 millioni koruuniusunit, matussuserneqassapput. Tamannarpiarlu pissutigalugu kommunimi innuttaasut 21.000-usut akileraarutaat 42 procentimiiginnassalluni.
- Uagutsinnut toqqissisimanarpoq, allaffissornikkut sulisunut aamma innuttaasunut, Borgmester Asii Chemnitz Narup tulluusimaaqisoq oqarpoq.
- Kommunerujussuanngornermut ikaarsaarianermi aningaasarliuleraluarneq qaangiuppoq. Aningaasanik aqutsilluartoqarpoq, Kommuneqarfik Sermersuup aappaagumut missingersuutai saqqummiunneqarmata borgmester Asii Chemnitz Narup, partiillu gruppiini siulitaasui marluk Mille Søvndahl, Inuit Ataqatigiit aamma Martha Abelsen, Siumut, peqatigiillutik aappaagumut missingersuutit saqqummiukkamikkit taama oqarput.
Kommunit akunnerminni akileraarutit eqqarsaatigalugit nalimmassaasarput, siornatigut Nuup kommunerisimasaa massakkullu Kommuneqarfik Sermersooq aamma nalimmassaanermi 70 million koruunit tungaanut akileeqataasussaassaaq:
- Ikioqatigiinnissamik isumamik aallaaveqarpoq, tamannalu uannut pingaaruteqarpoq aammalu kommunimit nuannaarutigaarput kommuneqarfitsinnut taamaaliorsinnaagatta, Asii Chemnitz Narup oqarpoq.
Naak aningaasaqarnikkut sukaterisoqaraluartoq, taamaattoq pilersaarutinut arlalinnut akissaqartoqarpoq. Sanaartornernut attuumassuteqartunut aningaasaliissutaapput 164 millioni koruunit, taakkulu ilaat Nuummi Tasiilamilu inissialiornernut atorneqassapput. 41 millioni koruunit Nuup mittarfiata allinissaanut aammalu Nuummi umiarsuarnut talittarfiup allinissaanut atorneqassallutik.
- Kommunalbestyrelsemi pingaartipparput siunissami sanaartornermut aningaasaliisarnissarput aamma aningaasanik tamakkununnga atugassanik illuartitsisassagatta, tassami tamanna kinguneqartarpoq kommunimut aningaasanik isaatitsinerulernermik, Asii Chemnitz Narup oqarpoq.
Inunnik isumaginninnermut tunngasunut sipaarutissat 55 millioni koruuniupput, allatulli iliornikkut aningaasat atorluarneqarnissaat kommunalbestyrelsemit sulissutiginiarneqarpoq:
- Uagut isumaqarpugut, ilaqutariinnik sullissineq uunga samminerulertariaqartoq, sapinngisamik siusissukkut ilaqutariinni ajornartorsiortoqartillugu, ilaqutariinnik avissaartuutsitsinani naqqutissiuupparput, Kommuneqarfik Sermersuup borgmesteria, Asii Chemnitz Narup erseqqissaavoq.
