Nunatsinni katersukkat 2 mio.-it angulerpaat

Asiami ikiuigassanut nunatsinni Røde Korsip katersuiniartitsinera suli ingerlalluartuarsinnarpoq, maannamut katersukkat 1,7 million kroninngoreerlutik, illoqarfinni nunaqarfinnilu katersukkat.

Sisimiut nunaqarfianni Itillimi aamma maanna katersuiniarput, Asiami ajunaarnersuarmi ikiuutissanut ilapittuutissanik.

Nunaqarfimmi aqutsisut siulittasuat, David Kleist oqarpoq Itillimi katersuiniarneq marlunngormalli aallartittoq. Katersuiniarnerlu aqagu tallimanngornermi naggataarneqartussaq ingerlalluarnerarpaa, katersuiniaqataasut amerlanaartorujussuusimanerarlugit. Marlunngormat 2000 kronet anguneqarsimapput, ippassarlu aamma bingortitsisoqarsimavoq, immikkut ikiuukkumasut aamma tunisinissamut periarfissinneqarsimallutik.

Katersuiniarneq bango-mik bingomillu aqagu naggaserneqassaaq. David Kleistip 5000 kronet anguneqarsinnaanissaat neriuutiginerarpaa.

Kalaallilli Nunaanni kommunit minnersaat Qaanaaq tukkunerpaatut oqaatigineqarsinnaagunarpoq, tassani kommunalbestyrelsip immikkoortissimammagit 50.000 kronet, aningaasallu aalajangersimalluinnartumik tunniuteqqusaallutik meeqqanut ajunaarnersuarmi angajoqqaaminnik annaasaqarsimasunut, Qaanaap borgmesteri, Naimángitsoq Petersen oqarpoq.