Nunatsinni juulli noorliit sunnersimavaat

- Tyskit immikkoorutigivaat taallap tusarnersumik erinaqarnissaa assut pingaartittaramikku, tulleeriillunilu tussiarneq erinarsoqatigiinnilu aqutsisoqarneq. Tussiartaaseqarput arriitsuaqqamik misigissutsinik ersertitsisunik, Aage Rydstrøm Poulsen oqaluttuarpoq. 

Erinarsoqatigiinni N.I.P.I-kkunni aqutsisup Per Rosingip taperserpaa tussiutit erinarsoqatigiinni atorneqeqartartut amerlanerit Tysklandimeersuusut.

- Taamatut tussiariaaseq Europaminngaanneersuuvoq. Naaggaartut tussiariaasiat Tysklandimiit Europap avannaanut siaruaakkiartorsimavoq. Erinarsoqattaartuni tussiarneqartartut ilaatTysklandimeerput, ilaat Danmarkimiit ilaallu kalaallit sanaaraat, taama Per Rosing nassuiaavoq.

Per Rosingi erinarsoqatigiinni aqutsisutut Det Kongelige Danske Musikkonservatoriumimi Københavnimiittumi ilinniarsimavoq. Soqutiginninnera meeraanermini naalagiartarnerani sorlaqarpoq.

- Meeraallugali nuannarigakku erinarsuutinik tusarnaarlunga, taavalu meeraallunga tussiaqattaartut tusaagaangakkit nuannaartorisarakkit. Organi Jonathan Petersen angumerillatsiarpara oqaluffimmi suli pattattuusartoq ammalu palasi Niels Lynge. Nuannaartorigaarakkit meeraallugali eqqarsartalerpunga uanga inersimasunngoruma organistinngorniarlunga, taama oqaluttuarpoq Per Rosing.

Tunisigaanni uteqqissinnaasarpoq, Per Rosingillu oqaluttuarivai pissarsiarisartakkani erinasoqatigiinniit, oqaluffimmiit tusarnaartuniillu.

- Ima oqarsinnaavunga pinngitsoorsinnaajunnaarnikuuvara, pisuunngortarpunga inuttut anersaakkullu. Upperisakkuinnaanngitsoq sutigut tamatigut soorlu inoqatinut asanninnikkut misigissutsikkalu sakkortusisarput, Per Rosing oqarpoq.

Erinarsoqatigiinni N.I.P.I-kkunni Per Rosingip saavaniittartut ilagaat Rosina Heilmann, ukiut 27-issaat ilaasortaasoq N.I.P.I-kkunnilu siulittaasuulluni. Rosina Heilmannimut aamma tunissutaavoq erinarsoqatigiinni tussiaqattaartarneq.

- Pissarsiakka imartoorujussuupput, uannut sunniuttarneri sakkortoorujussuupput. Ilaanni nuannaanngissuteqarluta aggeraagatta, erinarsornerup salittarpaatigut, qamuuna immerneqartarpugut. Soorlu oqinnerusutut misigillunga angerlartarlunga, taama oqaluttuarpoq Rosina Heilmann.

Erinarsoqatigiit N.I.P.I-kkut ukioq 1978-imi Nuummi pilersinneqarput.