Nunatsinni ivigaaraasanik arsaattarfeqalernissaa misissorneqarpoq

Ivigaaraasanik arsaaffinnik immikkut ilisimasalik nunatsinni illoqarfinni pingasuni misilluini tikeraaqqammerpoq. Arsaattarfiit qanoq isikkoqarnersut, qanorlu sananeqarsimanersut misissorpai.

Ivigaaraasanik arsaattarfiliortoqassappat nunatsinni arsaannermut siuariarnerujussuussasoq Kalaallit Nunaanni Arsaattartut kattuffianni siulittaasoq Lars Lundblad oqarpoq.

Ivigaaraasanik arsaaffinnik immikkut ilisimasalik Qaqortumi Nuummi Sisimiunilu juunip qaammataani tikeraaqqammersup ivigaaraasanik arsaattarfiliornissamut periarfissat misissorpai. Ivigaaraasat plastikinik sanaajupput nunatsinnullu naleqquttuullutik. Taamaalilluni arsaattarfinnik putoqanngitsunik maqalloqanngitsunillu arsaattarfeqalersinnaavoq, tamannalu timersorneq ineriartortilluarsinnaagaa Kalaallit Nunaanni Arsaattartut kattuffianni siulittaasoq Lars Lundblad oqarpoq.

-Kalaallit arsaattartui unammiartorlutik aallartuaannarput. Ivigaaraasanik arsaattarfeqalertuuppat tikeraartakkagut, soorlu Gibraltarikkut allallu unammisartakkagut aggersinnaanngussagaluarput, taamaalillunilu unammersuaarnerit nunatsinni ingerlanneqartalissagaluarlutik. Aamma nunanut allanut unammisartut sungiusarfissaminnik peqalissagaluarput, Lars Lundblad oqarpoq.

Savalimmiormiut ukiut qulit ivigaaraasanik arsaattarfeqartut FIFA-mut ilanngupput, taamaalillutillu nunarsuarnut allanut arsaattartunut akuulerlutik.

-Savalimmiormiut aasaq manna EM-imut anngunniullutik VM-imi finalernikut Italia Frankrigilu unammissavaat taakku savalimmiunukartussaallutik. Takornariaqarnikkut sorpassuartigullu arsaannissat taakkua savalimmiunut sunniuteqartussaapput. Taamaammat ivigaaraasanik arsaattarfiliortoqartuuppat nunatsinnut imminut akilersinnaassagaluarpoq, Lars Lundblad oqarpoq.

Lars Lundbladip ilanngullugu oqaatigaa, Ilulissat ivigaaraasanik arsaattarfiliornissaminnut aamma pilersaaruteqartut.