Nunatsinni isikkamik arsaattartut Frankrigimi aviisimi allaaserineqarput
“Isikkamik arsaanneq Kalaallit Nunaanni soqutigineqartorujussuuvoq, nunami tassani, Frankrigimit sisamariaammik annerusumi, arsaattartut peqatigiiffii 30-t missaanniipput, taakkunanilu angutit arnallu 5000-it sinneqartut arsaannermik ingerlataqarput,” Le Figaro allappoq, nangillunilu: “Qeqertarujussuarmi tassani isikkamik arsaannermik soqutiginninneq taama atsigigaluartoq kalaallit nunanut allanut unammisartutik nunaminni unammitillugit suli takunikuunngilaat.”
Europamiut isikkamik arsaannermik kattuffissuata UEFA-p kalaallit arsaattarnerannik tapersersuinnginnera allaaserineqarpoq. Nunanut allanut unammisartuni sungiusaasup, Jens Tang Olesenip, UEFA-p siulittaasuanut Michel Platini-mut oqariartuuteqarnermini franskit aviisiat atorpaa, tamatumanilu akuerineqarnissaq ilaatigullu ivigaaraasalimmik arsaattarfittaarnissamut aningaasatigut tapersersorneqarnissaq qinnutigalugu.
- EM-imut imaluunniit Champions League-mut ilaasalernissarput naatsorsuutiginngilarput. Kisianni isikkamik arsaannerup ineriartortinnissaanut ikiorserneqarnissamik pisariaqartitsivugut. Taamaallaat ujaraaqqanik qallikkamik arsaattarfeqarnerput naammaginanngilaq”, sungiusaasoq allaaserisami taama oqarpoq.
Nunanut allanut unammisartuni sungiusaasup nunat tamalaat akornanni isikkamik arsaannermik unammersuarneq Nunatsinni 2011-imi aaqqissuussinnaanissaa suli neriuutigaa.
