Nunatsinni isertitsivinnut utaqqisut aatsaat taama amerlatigipput
Nunatsinni isertitsivinnut utaqqisut aatsaat taama amerlatigipput, utaqqisulli ikilisarnissaat danskit Inatsisinut atortitsinermut ministeriaqarfianut atasuummat nunatsinniit iliuuseqarfiginissaat killeqartoq, Inatsisinut atuutsitsinermut naalakkersuisoq Aleqa Hammond oqarpoq.
Nunatsinni isertitsivinniittut ullumikkut 103-nik amerlassuseqarput, pineqaatissinneqareerlutillu isertitsivinnut utaqqisut 17o-t missaanniillutik.
Danskit Inatsisinut atortitsinermut ministeriat Lene Espersen sapaatip-akunnera kingulleq TV-avisimi saqqummerpoq, nuannaarutigalugu Danmarkimi parnaarussivinnut utaqqisuerussimammat. Inatsisinut atortitsinermut naalakkersuisup Aleqa Hammond-ip tamanna tusarlugu Danmarkimi tusagassiorfinnut nalunaaruteqarpoq nunatsinni utaqqisut aatsaat taama amerlatigimmata.
-Qallunaat inatsisinut atortitsitsinermut ministeriata Lene Espersen-ip TV-avisikkoornerata kingorna aqagukkut illuatungilerniarlugu maani naalakkersuisutut, Danmarkimi tusagassiutitigut nalunaaruteqarpunga erseqqissaavigalugit, qallunaat justitsministeriata akisussaaffiata ilagigaat nunatsinni inatsisinut atortitsinermut tunngasut. Taassuma akerlianut aamma nalunaaruteqarniarlunga erseqqissaavunga, qallunaat kunngeqarfiata iluani aamma nunatsinni pissutsit taassuma akisussaaffigai, killormuanillu nunatsinni ingerlasoqarnera erseqqissaatigalugu, neriullunga paasineqassasoq, nunatsinni atugarisagut ima kipilertunartigisut, isertissimasatsinninngaanniilluunniit marloriaataanik amerlanerit utaqqisuniittut, Aleqa Hammond oqarpoq. Ilanngullugu oqaatigaa isertitsivinnut utaqqisut ikilisarniarlugit suliniutit suli sakkortunerusumik iliuuseqarfigineqarnissaat:
-Pingaaruteqartorujussuuvoq suliniutitta suli sakkortusiffigineqarnissaa, nunatsinni pinerluttaalisitsineq pitsaanerpaamik ingerlanneqassappat aamma isertitsivigineqarsinnaasut aamma pisariaqarpagut, ullutsinnut pisariaqartitsinermut naapertuuttunik. Ullutsinnut naapertuutinngimmata utaqqisorpassuit tulleriiaaqqapput isertitsivinnut isertinneqarnissaminnut Aleqa Hammond oqarpoq.
Ilanngullugu oqarpoq inuiaqatigiinni toqqissisimasumik inuusoqassappat, pinerluttaalititsinerlu iluamik ingerlanneqassappat annertunerpaamillu kinguneqassappat, isertitsivinni malinnaanissaq pingaaruteqarluinnartuusoq.
-Tamanna akisussaaffik qallunaat naalagaaffiata akisussaaffigivaa, uangalu sulissutiginiarpara akisussaaffiat tamanna erseqqissaatigissallugu tusagassiutillu atorlugit, Aleqa Hammond oqarpoq. Tulliani Sisimiuni isertitsiviliortoqassaaq, kommunalbestyrelsillu februaarip naanerani aalajangiiffigissavaat.
