Nunatsinni inuusuttut atuakkiornermut unammisippaat

Inuusuttut 15-it 25-illu akornannik ukiullit atuakkiorsinnaanermut piginnaasaminnik misiliisussanngorput. NAPA, Nunatta Atuagaateqarfia, NUIF aamma Milik Publishing atuakkiornermik unammisitseqatigiipput ajugaasoq 2.500 koruuninik allannermullu pikkorissarnermi pissarsiassaqartillugu. Pikkorinnerit qulit suliaat kalaallisut qallunaatullu saqqummersinneqassapput. Unammisitsinermi qulequtarineqarpoq Nunatsinni inuusuttuuneq - nunarsuarmi inuusuttuuneq.
Allattoq Noah Mølgaard
maajip 23-at 2012 07:44

Nunatsinni inuusuttut atuakkiaat akuttoqaat. Eqqoriarneqartarpoq atuakkat qulit missaannaat inuussututut taaneqartartutut sammisitaallutik saqqummersartut. Tamannalu qanoq iliuuseqarfiginiarneqarpoq kalaallisut atuakkiat amerlisarniarlugit atuakkiornermik unammisitsisoqalermat.

- Anguniarpassuatta ilagaat kalaallisut oqaatsit aallunnissaat kalaallisullu oqaatsit soqutiginarsarnissaat. Tamatumalu tusagassiutini sammineqarnissaa angusinnaagutsigu kalaallisut oqaluttuariaatsip ingerlaqqinnissaa aqqutissiutissagaluarparput, Leise Johnsen NAPA-mi pisortaq oqarpoq unamminermillu aallartitseqataasoq Lene Therkildsenip oqaasii nangippai:

- Inuusuttut eqqarsaatinik kissaatinillu allaganngorlugit saqqummiussinissamut periarfissippagut. Piumasaqaataanngilaq kalaallisut allannissaat. Peqataasut periarfissaqarput qallunaatut allannissamut. Pingaarnersaavoq inuusuttut amerlasuut atuakkiornermik aallartinnissaat.

Unammeqataasut allataannik nalilersuisussat toqqartorneqarput tassaasut Hans Anthon Lynge, Birgit Kleist Petersen, Katti Frederiksen aamma Jessie Kleemann. Unammeqataasut allataat takkussortut nalilersorneqassapput piukkunnarnerillu qulit toqqarneqarumaarput 2013 aallartilaarpat saqqummiunneqarumaarlutik.

- Imarisassai eqqarsaatigalugit annerusumik piumasaqaateqanngilagut. Aamma ilisimaqqissaanngilarput suna atuarusunnerlugu tamanna peqataasut allataasa takutikkumaarpaat. Allaaserineqartut arlaannik oqaluttuukkumaarpaannga uagullu atuakkiat pitsaasut ajortullu pillugit isummersoriaaserput naalagaassanngilaq inuusuttut sunik allakkusunnerannut, nalileeqataasussaq Birgit Kleist Pedersen oqarpoq.

Unammisitsineq ukiormanna septemberip aallartinnerani aallartissaaq tunniussinissamullu periarfissaq kingulleq tassaavoq decemberip aallaqqaataat. Taanna sioqqullugu aaqqissuisut neriuutigaat suliniut Allatta-mik atserneqartoq tapersersorlualerumaaraat.

- Periarfissaqarpoq oqaluttualiaaqqamik quppernerit 20-it angullugit takissusilimmik allannissamut ajugaasullu Kangerlussuarmi allannermut pikkorissarneqarumaarput allallaqqisut Jessie Kleemann aamma Mette Moestrup pikkorissaasorissallugit. Taamaasillutik unammeqataasut periarfissaqassapput allatamik saqqumminnginneranni kalaallisut qallunaatullu iluarsaateqqilaarnissaannut. Eqqumiitsuliornermik ilinniarfik aamma isumaqatigiissuteqarfigaarput atuakkap assiliartaannik suliaqassasut taamaasilluni suliaq Kalaallit Nunaanni inuusuttut eqqumiitsuliaattut taaneqarsinnaaniassammat, suliniummik ataqatigiissaarisoq Katja Vahl NAPA-meersoq oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq