Nunatsinni inuit 1000-it sinnerlugit coronavirusimut misissorneqareersut
Nunatsinni coronamik tunillatsissimasunik nutaanik ullumikkut aamma paasisaqartoqanngilaq.
Peqqinnissamut oqartussat nunatsinni inuit 1000-init amerlanerusut maanna misissorsimalerpaat. Misissukkallu inerneri nutaat ullumi takkuttut tamarmik aamma tunillatsissimanngitsuupput.
Misissorneqartut katillugit 1019-iupput. Taakkunannga 932-t tunillatsissimanngitsut 11-llu tunillatsissimasut paasineqarput, tunillatsissimasullu tamarmik peqqisseqqereerlutik. Misissorneqartut 76-it akissutersinissaat maanna utaqqisaavoq.
Kisitsisit nutaat ullumikkut takkuttut tunngavigalugit nunatsinni ullut aqqaneq-marlussaanni nutaanik tunillatsittoqanngilaq.
Nunatsinni coronavirusimik tunillatsissimasutut paasineqartut kingulleq apriilip ulluisa sisamaanni paasineqarpoq.
Københavnimi Kalaallit Peqqissartut Illuanni najugaqartoq ataaseq apriilip ulluisa qulinganni tunillatsissimasoq paasineqarpoq. Danmarkimut peqqissariartortoq nunatsinnut angerlariartuleraluarpoq, nunatsinnullu angalasussat allat assigalugit taanna misissorneqarpoq.
Nuuk arriitsumik ammaqqikkiartortoq
Coronamik tunillatsissimasoqarnera pissutigalugu nunatsinnit nunatsinnullu angalaneq inerteqqutaavoq, illoqarfiillu pingaarnersaat matoqqasimalluni.
Malittarisassalli sukannersut maanna qasukkarneqariartulerput.
Naalakkersuisut siulittaasuata, Kim Kielsenip (S) oqarnera naapertorlugu ilinniarfeqarfiit ilaat ammaqqikkiartulerput aamma tunillatsissimasunik allanik paasisaqartoqanngippat atuarfiit paaqqinniiffiit sapaatip-akunnerata tulliani aamma ammaqqissinnaassagunarput.
Atuarfiit paaqqinniffiillu marsip ulluisa 18-ianniilli matoqqalerput.
Nuummi Nuuk Centerimi pisiniarfiit aamma matoqqagaluartut ullumi ammaqqipput, imigassallu inerteqqutigineqarnera sivitsorneqassanngitsoq Naalakkersuisut ippassaq saqqummiuppaat. Taamaammat viinit, immiaaqqat imigassallu pisiniarfinni ullumi quliniit pisiarineqaqqissinnaalerput. Taakku tuniniarneqarnerat arfininngorneq, marsip ulluisa 28-anni nalunaaqutaq unnukkut arfineq-pingasunngunngitsiartoq matuneqarput.
Nujaleriffiit, timigissartarfiit, timersortarfiit, timimik sungiusaasut allallu apriilip ulluisa 30-aatinnagu ammassanngitsut, Naalakkersuisut nalunaarutigaat.
Timmisartukkullu angalanerup inerteqqutigineqarnera apriilip ulluisa 30-annut suli atuuppoq. Tamanna nunatsinnut nunatsinniillu angalanermut atuuppoq.
