Nunatsinni innuttaasunik sullissineq pitsanngorsarneqassaaq
Innuttaasut sumiluunniit najugaqartuugunik aamma pisortat oqartussaqarfiinut sorlernulluunniit ikiorserneqarnissaminnik pisariaqartitaminnik saaffiginnittussanngorunik, sumiiffimminni ataasiinnarmik saaffissaqalernissaat, kiisalu sulisunit innuttaasunik sullissinermik pikkoriffeqartunit sullinneqartalernissaat, Nunatsinni innuttaasunik sullissinerup pitsanngorsarneqarnissaa qulequtaralugu Sisimiuni ataatsimeersuarnermi oqaluuserineqarput.
Allattoq Elisa Isaksen
oktobarip 19-at 2009 05:51
Inerniliussami oqaatigineqarpoq, ersarissumik najoqqutassiortoqassasoq, taamaalilluni innuttaasut sullinneqarnerminni kommunimi aamma Namminersorlutik Oqartussani piginneqataasunut misigisimaqqullugit.
Tamatuma saniatigut kommunini aamma Namminersorlutik Oqartussani Innuttaasunut Sullissiviit najoqqutassiorneqassapput, aamma kommunini Namminersorlutillu Oqartussani sulisut pikkorissarnissamut piginnaasanillu ineriartortitsinissamut periarfissinneqassapput, taamaalilluni siunertarineqartoq anguneqarsinnaaniassammat.
Ataatsimeersuarnermi peqataasut assigiinngitsuneersuupput, tassaasut kommuninit tamanit aallartitat, Namminersorlutik Oqartussaneersut, KANUKOKA-meersullu.
