Nunatsinni inissiat pingasuugaangata marluk nutartertariaqalersimasarput
- Inissiat pingasuugaangata marluk nutartertariaqalersimasarput. Inissiallu pingasorarterutaannaat inissiatut pitsaasutut taaneqarsinnaapput, INI-p pisortaa, Jukku Mølgaard Boligenimut oqarpoq.
Namminersorlutik Oqartussat ineqarnermut politikki pillugu nassuiaasiortitsinerani ajornartorsiutit qulaajarneqarnerisa kingorna Nuummi inissiarsuaq Blok P isaterneqarpoq. Atuagassiap Boligenip Blok P-p toqqavigisimasaa annertuupilussuaq Nuummi qeqqani ikersuartut taavaa inissiarsuillu qulit eqqaaniittut aamma iluarsaanneqartariaqartutut eqqaallugit:
- Tassalu Blok 1-imit 10-mut. Taakku Danmarkimiissimasuugunik ukiorpassuit matuma siorna Landsbyggefondenip sullitaasa pingaarnerit ilagilersimassagaluarpaat, Boligen allappoq.
Inissialli pitsaassusaat kisiat ajornartorsiutigineqanngilaq. INI-p ajornartorsiutiginerpaasaasa ilagaat inissianik attartortut ineqarnermut akiliinissaminnik ajornakusoortitsinerujussuat. Tamannalu pissutigalugu INI-p ukiumoortumik naatsorsuutaani kingullerni attartortuminit 80 mio. koruunissaqartoq takuneqarsinnaavoq. Allatut oqaatigalugu attartortut tamarmiusut tamarmik immikkut qaammatip aappaa avillugu ineqarnermut akiliutinik akiligassarput.
Silap pissusiisa allanngoriartorneri Kalaallit Nunaanni inissiat ajornartorsiutigineqarnerini suli ajornerulersiinnarpaat. Boligen oqaluttuarpoq Sisimiuni inissiarsuaq aqqaneq marlunnik inissiartalik najugaqarfissatut naleqqukkunnaarsimasoq. Taanna inissiarsuit qaqortut ilagaat. Ajornartorsiutaasorlu tassaavoq inissiarsuup qaarsumut toqqavilerneqarsimannginnera, naak tamanna Kalaallit Nunaannut naleqqunnerpaajugaluartoq. Inissiarsuaq nunamut qeriuaannartumut toqqavilerlugu sananeqarsimavoq. Tassalu issup ataatigut sermitallip qaavanut.
Silallu pissusiisa allanngoriartornerisa pilersitaanik sermip aakkiartulernera ajornartorsiutigineqalerpoq ineqartullu oktobarip naannginnerani nuuttariaqassapput.
Kangerlussuarmi inissiat nutaajunerit tamangajammik nunap qeriuaannartup qaavanut toqqavilerlugit sanaajupput, Ini-mi suliniutinut pisortaq Robert Høegh Boligenimut oqarpoq, tamannalu pissutigalugu aamma Kangerlussuarmi ajornartorsiutinngupallassinnaavoq.
