Nunatsinni inissiat illullu allat PCB-qassusiat misissorneqassaaq
Nunami namminermi pissutsinut naalakkersuisoqarfimmi immikkoortortami pisortaq Tina Kreutzmann Petersen oqarpoq, Blok Q pillugu nalunarusiaq, ingutsikkanit igitassat qanoq passunneqarnissaannik sammisaqarfiusoq, misissuinnernik allanik malitseqassasoq. Tassalu illup iluini silaannaap qanoq inneranik, nunap mingutsinneqarsimaneranik, PCB-mik piiaasut qanoq atugaqartinneqarnissaannik aammalu illut ingutsikkat PCB-rtaqarpata taakkua qanoq pineqarnissaannik misissuisoqassaaq.
Misissuinerit tamakkua tamarmiullutik peqqinnissakkut sunniutaasinnaasunut pisortat innuttaasunik illersuinissaannut periarfissinniartussaavaat. Tassami PCB ulorianartutut pasineqarmat, 1976-imi sanaartornermi atortuni akuutissatut inerteqqutigineqalerpoq.
Suliassaq angeqaaq. Illut nalunaarsorneqarneri tunngavigalugit naatsorsuutigineqarpoq, Nunatsinni inissiat illullu allat 5000-it missaat 1965-ip 1975-illu akornanni sananeqarsimasut PCB-mik akoqassasut. Sanaartornermi atortuni assigiinngitsuni, soorlu qalipaatini, qarmasissiani igalanullu oqorsaatini PCB taamani atorneqartarpoq, ilaaatigut qitullisaataalluni.
Kisianni 1976-imi inerteqqutaalerpoq, hormoninik allanngortitsisinnaasutut kræfteqalisutaasinaasutullu pasineqarluni.
Qanorli ulorianartiginersoq ersarissumik suli akissutissarsineqanngilaq. Nunatsinni nakorsaaneq Flemming Stenz Radioavisimut siusinnerusukkut oqarpoq, PCB ulorianarlunilu ulorinananngitsoq.
- Ingerlaannarluni sunniuttartumik ulorianartortaqanngilaq, kisianni qanimut sunnerneqartunut PCB annerujartortumik akuuleruttarpoq, taamaammallu piffissami ungasinnerusumi sunniuttarluni, Flemming Stenz taamani oqarpoq.
Immikkulli ilisimasallit naapertorlugit PCB assigiinngitsuuvoq, akuisa angissusiat apeqqutaalluni. Taamaammallu aamma peqqinnissamut ulorianassusia assigiinngiiaarsinnaavoq.
Kisianni PCB Nunatsinni ajornartorsiutaavoq, aalisakkanik, puisinik arfernillu nerisaqarnitsigut timitsinnut angisuunngorluni akulerussimagami. Tassami Nunatta imartaani nerisaqatigiiaat PCB-linnit mingutsinneqarsimapput, Europami Amerikallu avannaani nunanit tunisassiorfiusunit silaannakkoortumik mingutsitsisoqarnera peqqutigalugu.
- Taamaammat ajornartorsiut pimoorullugu suliaraarput. Taamaammallu inissiat qanganitsat PCB-qarnerisigut peqqinnissakkut ajoqutaasussat killilersimaarniarlugit iliuuseqarnissamut Avatangiisinut Pinngortitamullu Aqutsisoqarfimmiit piareersimavugut, Tina Kreutzmann Petersen oqarpoq.
Taanna nangilluni oqarpoq, PCB-mik ajornartorsiutit pillugit paasissutissat Nuummi aggusti qiteqqusimalerpat ataatsimiinnermi katersorneqassasut. Ataatsimiinnermi pisortaneersut peqqinnissamik immikkut ilisimasalinnik, avatangiisinut tunngasunik sulialinnik sanaartornermillu sulialinnik ataatsimeeqateqassapput.
