Nunatsinni imartarujussuaq ilisimaneqanngilaq

Imartat angallaviillu takornariaqarnermi inuussutissarsiornermilu atorneqartut salliutinneqanngillat nunatsinni imartat uuttortarnissaanni. Avatangiisinut ministeri Ida Auken taama Sara Olsvigimut nalunaarpoq juullinngilaartoq apeqquteqareersoq.

Maanna akissut takkuppoq. Tassani erserpoq Nunatta imartaata 20 procentia taamaallaat uuttortarneqarsimasoq. Imartarujussuit Upernaviup eqqaani tunumilu sukumiisumik uuttortarneqarsimanngillat. Nunatta imartaata tamarmik nutaamik uuttortarneqarnera ukiut qulit qaangiuppata aatsaat naammassisinnaavoq. Sara Olsvigili isumaqarpoq imartanik "ilisimaneqanngitsunik" uuttortaanissaq nukiginnarsisoq.

- Isumaqarpunga nukinginnartoq tunumi avannaanilu imartat amigartumik uuttortarneqarsimaffiisa ullumikkornit tutsuiginarnerusunik imaani asseqalernissaat, Sara Olsvig oqarpoq.

- Ilanngullugu misissortariaqarparput nunat issittumiittut nunatta imartaanik uuttortaasarsimanersut.  Taamaasilluta naalagaaffiit allat suleqatigalugit issittup imartaa pillugu paasissutissat uuttuisimanerillu katersussagaluarpagut issittup imartaanut immap assigi tutsuiginartut pigineqalerniassammata. Imaani isumannaallisaanermut pingaaruteqarluinnarpoq imap assigisa tamakkiisut piginissaat, Sara Olsvig oqarpoq.

Ukiormanna imartanik uuttortaasoqartussaavoq. Avatangiisinut ministerip Ida Aukenip tuppallersaatigaa Nunatta imartaata annersaa minnerpaamik 200 meterinik itissuseqarami angallavigissallugu uloriananngitsoq. Taamaattorli imartat ilaat ikkarluppassuaqarput.

Imartanik uuttortaanissani imartat angallavigineqarnerit salliutinneqarput. Imartat pineqartut tassaapput: Nuuk, Sisimiut, Uummannaq, Aasiaat, Maniitsoq, Qaqortoq, Nanortalik, Paamiut, Ilulissat aamma Narsaq.

Imartat uuttuiffigineqartussat Namminersorlutik Oqartussat aamma Royal Arctic Line ilaatigut suleqatigalugit pingaarnersiorneqartarput.