Nunatsinni ilisimatusarnermut 14,7 millioninik tapiissuteqartoqarpoq
Aarhus Universitetimi Geosciencemut Instituttimi lektori, Nicolaj Krog Larsen, Tunup avannaarsuani Sermersuup ilisimatusarfiginissaanut 7 mio. koruuninik tapiiffigineqarpoq. Sermersuup iigartarfiisa immap qaffakkiartorneranut tunngatillugu pissusaat misissorniarpaa. Tapiissutigineqartullu ilaatigut Villum Research Stationimi Station Nordimilu asimi suliaqarnissamut kiisalu sulisussanik atorfinitsitsinissamut atorniarpai.
Aammattaaq Sofia Ribeiro GEUS-imeersoq Issittup imaata sikuanik pinngortitallu ataqatigiinneranik misissuilluni suliniuteqarnissaminut 3,7 mio. koruuninik tapiiffigineqarpoq.
Signe Normand Schweitzimi ilisimatusarfimmi orpippassuarnik, apummik nunamillu ilisimatusarnermut immikkoortortameersoq aamma qulimiguuleeqqat inuttaqanngitsut atorlugit Issittumi naasoqassutsimik misissuinissaminut 4 mio. koruuninik tapiiffigineqarsimavoq. Signe Nordmand L’Oréalip UNESCO-llu nersornaasiuttagaannik Women in Sciencemik taasamik qanittukkut aamma tunineqarpoq.
Villumip aningaasaateqarfia Young Investigator Programmemik taasaq aqqutigalugu pingajussaanik tapiissutinik agguaavoq. Ilisimatuut januaarip 23-iani nalliuttorsiorpalaartumik katerisimaanermi nersorniarneqassapput.