Assi: Stephan Bernberg

Nunatsinni Ilisimatusarfiit avannarpasinnersaat atoqqaarfissiuleraat

Nunarsuup silaannaata kissatsikkiartornera nunarsuarmi sumiiffiit nillernerpaaffianni ilisimatusarfigineqassaaq. Kalaallit Nunaata avannaarsuani Station Nordimi Villum Research Stationimi ilisimatuut nunarsuarmit tamaneersut ilisimatusarsinnaapput.

Avannarpartingaatsiassaagut. Ilisimatusarfik nutaaq Qalasersuarmit 900 kilometeriinnarnik ungasitsigisumiippoq. Villum Research Station taamaasilluni inoqarfimmit qaninnermit Illoqqortoormiunit nunarsuup avannarpasinnerpaaffianut qaninneruvoq.

Sakkutuut ilisimatuullu
Station Nord maannamut sakkutuujunerusunit atorneqarsimavoq. Siriusip alapernaarsuisui tassanngaanniit aallarfissaminnut timmisartumik angallanneqartarput. Sakkutuulli siunissami ilisimatuunit nunarsuarmi tamaneersunit ilaqartussanngorput. Ilisimatusarfik nutaaq, silap pissusianik ilisimatusarfiusussaq, danskit silap pissusia pillugu ministeriannit Rasmus Helveg Petersenimit ataasinngorpat atoqqaartinneqassaaq. Suliaqarfiit assigiinngitsut pitarlugit ilisimatusarneq ingerlanneqassaaq.

Avannaarsuani kiassiortut
Nunarsuup silaannaata kissatsikkiartorneranik ilisimatusarnerup sumiiffimmi ukiumut agguaqatigiissillugu -14º C-inik issittartumi ingerlanneqarnera immaqa eqqumiiginarsinnaavoq. Sikumili, imaani, nunami silaannakkullu misissuinerit silap pissusiata qanoq allanngoriartorneranut paasissutissanik pingaarutilinnik pissarsiaqarfigineqarsinnaapput.
 

- Nunarsuarmi inunnut aarlerinarnerpaasut tassaapput silap pissusiata allanngoriartorneri - iliuuserineqartullu naammaginanngillat. Taamaammat silaannaap kissatsikkiartornerata naleqqussarfigisinnaasatsinnut 2° C-miiginnarnissaa qulakkeersinnaanngilarput. Taamaammat silaannaap kiassusaa 2° C sinnerlugit qaffassagaluarpat tamanna qanoq sunniuteqassanersoq paasissallugu pingaaruteqartupilussuuvoq, ilisimatusarfimmi nutaami pisortaq, professor Henrik Skov, KNR-imut taama oqarpoq.

Ilisimatuut pilerisuttorpassuit
Ilisimatuut taama avannarpasitsigisumi misissuinissaat maannamut ajornakusoortupilussuusimavoq. Nutaamilli ilisimatusarfeqalerneratigut taamatut suliaqarnermi atortorissaarutit nutaaliaanerpaat atorsinnaalissavaat. Aamma Station Nordip eqqaaniinnaq misissuisariaqanngillat. Misissuiviimmi angallanneqarsinnaasut atorlugit piffissami sivisunerusumi sivikitsumiluunniit nunap timaanut misissuiartornissaminnut periarfissaqassapput.
 

Periarfissallu nutaat issittumi ilisimatusartunut soqutiginartupilussuupput. Ukiormanna unnuinissamik inniminniisimasut maannamut 1.100-nngoreersimapput. Taamaammat siniffissat 14-iusut atorneqakulasussaassapput.
 

Ilisimatusarfik Aarhus Universitetip ingerlataraa, sanaartorneqarnera 70,5 mio. koruuninik naleqarpoq Villumillu Aningaasaateqarfianit akilerneqarsimalluni. Pigineqarnera Pinngortitaleriffimmit isumagineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat