Nunatsinni ilinniarsimasut amerlanerusut
Nunatsinni ilinniarluarsimasunngoraluttuinnarpugut. Naatsorsueqqissaartarfimmit naatsorsuutit tamanna ersersippaat amerlanerujartuinnartut meeqqat atuarfiat qimakkaangamikku ilinniagaqalersartut.
Allattoq Helle Nørrelund Sørensen
septembarip 16-at 2016 05:46
Nutserisoq Erna Lynge
Inuussutissarsiutiginiarlugu ilinniakkat tassaanerusut ilinniakkat isumassuinermut atugarissaarnermullu tunngasut- soorlu isumaginninnermut- peqqinnissamullu ikiortit isumaginninnermullu siunnersortitut ilinniakkat tassaapput 2005-imiilli amerlanerugaluttuinnartunit ilinniarusunneqarsimasut.
Tamaat isigalugu aamma allaffimmiutut, pisortaqarfinni sanaartorfinnilu amerlanerugaluttuinnartut ilinniagaqartalerput.
Nunatsinni inuit pingasuungaangasa ataatsimit amerlanerulaartut meeqqat atuarfiat qimareerlugu ilinniakkanik naammassisaqarsimasut Kalaallit Nunaanni naatsorsueqqissaartarfiup naatsorsugaani erserpoq.
Ukiulli qulit ingerlaneranni qaffariarneq 2 procentiinnaavoq.
Akerlianit ilinniaqqittut akornanni agguaqatigiisillugu siusinnerusumut naleqqiullugu ilinniartut qaffasinnerusumik ilinniagaqartarput.
Innuttaasut akornanni kandidatitut ilinniarsimasut amerliartuinnarput.
Kalaallit Nunaanni ukiut qulit ingerlanerinnaanni innuttaasut ph.D-qartut doktoritullu gradillit marloriaatinngorsimapput, taamaalilluni maanna taamatut taaguutillit 37-ullutik.
Arnat amerliartuinnartut nangitsillutik ilinniartaraluartut, angutit meeqqat atuarfiat qimakkaangamikku ilinniagaqartartut suli amerlanerupput.
