Nunatsinni ilinniakkaminnik naammassisartut amerliartuinnarput

Inuusuttut ilinniakkaminnik naammassinnittarnissaannik ukiuni kingullerni suliniuteqarneq iluatsikkiartulerunartoq, Naatsorsueqqissaartarfiup kisitsisaataasa tamanna ersersippaat. 2004-mi ilinniartut 643-t ilinniakkaminnik taamaatitsiinnarput, siornalu 478-iullutik.
Allattoq Lotte Holm
marsip 04-at 2009 07:42

Tamatuma peqatigisaanik ilinniakkaminnik naammassinnittut amerleriarsimapput. Naatsorsueqqissaartarfimmit oqaatigineqarpoq, ilinniakkaminnik unitsitsiinnartartut iliuuseqarfigineqarnerat iluatsissimasoq. Ilinniarfiit arlallit ilinniakkaminnik unitsitsiinnartartut ikilisarniarlugit assigiinngitsunik suliniuteqarsimapput, kisitsisillu ersersippaat tamanna iluaqutaasimasoq.

2004-miit 2008-mut agguaqatigiissillugu ukiumut 448-t ilinniakkaminnik naammassinnittarput, 2008-milu ilinniakkaminnik naammassinittut 479-iupput. Ilinniakkamik naammassinninnerit amerleriaataanni tunngaviusumik ilinniartitaanerit malunnaateqarnerpaapput, taakkunani 2008-mi ilinniakkaminnik naammassinnittut 2007-imut naleqqiullugit 14 procentimik amerleriarput.