Nunatsinni Hospice-mik pilersitsisoqarnissaa pisariaqartinneqartoq
Nunatsinni piartortunut napparsimavimmik hospice-mik sanasoqassappat, piartortut qulit imaluunniit aqqaneq marlut inissaqartinneqassasut Niels Peter Agger-ip siunnersuutigaa. Taama amerlatigisunik napparsimavimmi uninngasoqarsinnaassappat sulisut isumalluutigineqartut atorluarneqarnerusinnaassasut Danmarkimi misilittakkat takutippaat. Ukiorpassuit Danmarkimi piartortunut napparsimaviit atorneqarput, piartortut soorlu kræftimik nappaateqartut, anersaartuutimikkut nappaateqartut, allanillu nappaateqartut piartornerminni hospice-mi uninnganissartik aaliangertarpaat.
Nunatsinni ukiumut inuit 500 ataatilaarlugit toqusarput, toqusuni 29 procentii kræftimik toqquteqartarput, inuit toqusut 23 procentii allanik toqquteqartarlutik. Inuillu Kalaallit Nunaanni ukiumut toqusartut 7 procentii anersaartuutimikkut nappaateqarlutik toqusarput.
Nunatsinni ukiumut toqusartut qassiunersut paasereerulugu inerniliisoqarsinnaavoq Kalaallit Nunaanni piartortunut napparsimavimmik hospicemik immikkut pilersitsisoqarnissaa pisariaqartinneqartoq. Danmarkimi hospicemi ataatsimi agguaqatigiissillugu ukiut tamaasa piartortut 200-ut aamma 230-it tikillugit toqusarput. Kalaallit Nunaanni hospice-mik pilersitsisoqassappat ukiumut piartortut napparsimavianni toqusartut ikinnerulaassasut, Niels Peter Agger-ip ilisimatuussutsikkut misissuereerluni inernilerpaa.
Naliliinermi aamma isiginiarneqarpoq Nunatsinni piartortut Danmarkimi piartortunut neqeroorutaasartut assinganik neqeroorfigineqarneq ajornerat, soorlu angerlarsimaffimmi peqqissaasoqarnikkut, angerlarsimaffimmi suliassanut ikiorneqarnikkut, angerlarsimaffimmilu nipaallisaatit tungaatigut immikkorluinnaq ikiorneqarnikkut.
Piartortunut immikkut napparsimaveqalernissaq ukiumut 15-20 million koruunit missaanik akeqarnissaa naatsorsuutigineqarpoq. Napparsimaviup illutaa atortorissaarutillu atorneqartussat ilanngullugit 50 million koruuniinik akeqarnissaa ilimagineqarpoq. Napparsimavimmi piartortut inissaat saniatigut aamma ilaqutaasut inissaqartinneqassapput, uninngasut tamarmik immikkut uffarfeqartinneqassallutik immikkullu aamma anartarfeqassallutik. Saniatigut piartortutut inuunerat oqilisarniarlugu atortorissaarutit assigiinngitsut pisariaqartinneqartut pigineqassallutik. Piartortut sapinngisamik eqqissisimasumik avatangiiseqarlutik inuunerminnii ullut kingulliit atorsinnaanissaat anguniarneqassalluni.
Hospice-mik pilersitsinissami ajornartorsiutaasinnaasut ilagivaat ilinniarsimasunik sulisussaaleqinnissaq, immikkut ilinniarsimasut piartortut anniannginnissaat anguniarlugu nipaallisaatinik nakorsaasinnaasut.Tamannali sulisunik avataaniit tikisitsinikkut aaqqinneqarsinnavoq. Kingusinnerusukkut kalaallinik ilinniarsimasunik peqalerpat taakku taarserneqarsinnaassapput.