Nunatsinni eqqumiitsulianik katersugaasivissaq sulissutigineqalerpoq

Nunatsinni eqqumiitsulianik katersugaasivittaarnissaq ullumi Danmarkimi aningaasaateqarfiup imminut pigisup ”Grønlands Museum for Kunst”-ip sulissutigilerpaa.

Katersugaasivissaq Nuummi pilersinneqarpat uagutsinnuinnaanngitsoq – takornarianuttaaq iluaqutaassaqisoq, pilersitsiniarnermi siunnersorti oqaluttuarpoq.

Nunatsinni kujataamiut marluk naalagaaffiullu aningaaseriviata pisortarisimasaa suleqatigiissuteqalerput. Josef Motzfeldt, Jonathan Motzfeldt Bodil Nyboe Andersen-ilu ullumi katersugaasivimmi Kastrupgaardsamling-imi naapipput katersugaasivittaarniaqatigiit aallartittut najuuffigalugit.

Ukiup aappaa affaq qaangiuppoq eqqumiitsuliortut tallimat nunatsinni eqqumiitsulianik katersugaasivittaarnissamik isuma saqqummiummassulli, maannalu pilersitsinissaq aallarnerlugu suliniuteqartoqalerpoq. Uagutsinnuinnaanngitsoq nunami allamiunuttaaq katersugaasivissaq iluaqutaassaqaaq. Odsherred Museum-imi pisortaq Jesper Knudsen oqaluttuarpoq

Kalaallit Nunaamiut kusanartulianik katersugaaveqalerneq avammut kiinnertarnerminni iluaqutigissaqigaat.

Katersugaasiveqarnerup iluaqutaanera ilisimavaa, pilersitsiniallu siunnersorsimallugit. Titartaasussarsiortoqassaaq, sulili aalajangerneqanngilaq kia titartassaneraa.

Jesper Knudsen-illi ajoriffissaqartinngilaa titartaasartumit tusaamaneqarluartumit titartarneqarpat, iluaqutaaginnassanerarlugulu.