Nunatsinni Eqqumiitsulianik Katersugaasivissamut aningaasaliisussanik ujarlertoqassaaq
Taannalu tassaavoq Inatsisartut Siulittaasuat, Josef Motzfeldt danskit aningaasaateqarfiinut angisuunut aningaasannanniarluni maanna pulaaqattaalersoq. Tassami katersuiniarneq maanna aallartinneqassaaq.
Titartaasartunik unammisitsinermut piumasaqaatit naapertorlugit sanaartorneq aallartinneqassappat aningaasat atorneqartussat ulloq februaarip ulluisa arfineq-pingajuanni 2013-imi qulakkeereerneqarsimassapput.
Unammisitsinermi eqqaamaneqartutut titartaasartumit nunani tamalaani tusaamasaasumit Bjarke Ingels Group-imit, imaluunniit ilisimaneqarnerusutut, BIG-imit, ajugaaffigineqarpoq.
Titartaasarfiup Eqqumiitsulianik Katersugaasivissatut takorloorpaa illorssuaq 3.100 kvadratmeterisut angitigisoq Nuummi Tuapannguit aqqusernata qinnguani inissinneqartussaq. Tassani pinngortitamut ilassuuttunngorlugu qaqqamiit imaanut isikkivilerlugu sananeqassaaq.
Siunnersuut naapertorlugu illorsuaq sananeqassaaq atortussat tulluarsakkat pisariunngitsullu silap pissusaa anorilu malillugu allanngorartartut atorlugit. Aammattaaq katsersugaasivik ininik saqqummersitsivinnik arlaqartunik, kaffisorniartarfiutigaluni atuagaarniarfimmik, eqqumiitsuliortut sulliviinik, aanaveersaasarfimmik kiisalu ininik atuarfiusinnaasunik ilaqartinneqassaaq. Kusanartorsusaq akisoqisorli. Kisiannili qanoq akeqassanersoq Josef Motzfeldtip suli eqqoriarusunngilaa.
Maanna aningaasanik pissarsiornissaq siunertaralugu aningaasateqarfinnut assigiinngitsunut qinnuteqaqattaarnissaq siulliullugu sammineqarallassaaq. Josef Motzfeldtili isumalluarpoq. Tassami taassuma Kunngikkormiut aasaanerani nunatsinni angalaarnerat iluatsillugu, suleqatigiit aningaasanik katersiniartussat ilaasortassaannik nutaamik pissarsisimagami, tassalu Dronningip nalliuttorsiornermik aaqqissuisartua, Christian Eugen-Olsen, Kunngikkormiut aningaasaateqarfiini assigiinngitsuni misilittakkani atorlugit aningaasaateqarfinnik sorlernik aningaasaliisinnaassusilinnik ilisimasaqarluartoq.
Maannali periusissaq qaammammi uani inissinneqassaaq. Suliniutip immikkuualuttortai, sanaartornissamut ingerlatsinermilu aningaasaqarnikkut ilusissat quppersagaaranngorlugit piareerput, maannalu sulilluta aallartissinnaanngorpugut, Josef Motzfeldt oqarpoq.
Aningaasanik katersiniartussat arfineq-marluupput, marlunnilli ilaneqarsinnaallutik. Tassani ilasortaapput inuit inuiaqatigiinni assigiinngitsumik inissisimasut, kisiannili inuussutissarsiornermut aningaasaateqarfinnullu tamarmik attavigissaartunik.
