Nunatsinni eqqartuussivimmi equngasoqarpoq
Taama isumaqarput Inatsisinik Atortitsinermut Naalakkersuisoq Aleqa Hammond, ippassarlu ikeraartorisaa; Danmarkimi inatsisinik atortitsinermut ministeri Lene Espersen.
Nunatsinni unnerluussisuusartut ilinniagaqarnikkut tunuliaqutarissaarnerusarput illuatungaani illersuisuusartut ilinniagaqassutsikkut inorsartarlutik. Tamanna illersuisuusartunik kredsdommerinillu ilinniartitsisarnerup pitsaanerusinnaaneranik peqquteqartoq, Inatsisinik atortitsinermut naalakkersuisoq Aleqa Hammond oqarpoq.
Nunatsinni eqqartuussivimmi illersuisuusartunik kredsdommerinillu sulinermut atatillugu ilinniartsitsisarnerit pikkorissartitsisarnerillu amigaataaqaat, tamannalu eqqartuussaasunut soorunami naammiginartumik sullissinertut taaneqarsinaanngitsoq Aleqa Hammond erseqqissaavoq. Tamannalu pillugu inatsisinik atortitsinermut naalakkersuisoq Lene Espersenimut siunnersuuteqarpoq:
-Siunnersuutigaara nunatsinni eqqartuussiveqarfimmi suliaqartuusut ataatsimiititaliaqalissasut. Ataatsimiititaliaq eqqartuussiveqarfimmi sulisunik inatsisinillu atortitsinermut suliaqartunik inuttaqassaaq. Takkuulluta suliniutigisinnaavarput eqqartuussiveqarfimmi sulisunik pikkorissartitsisalernissat.
- Pingaartipparput ilisimatitsissutigissallugu nunatsinni utaqqeqqissinnaajunaaratta, eqqartuussiveqarmi atugassarititaasut akuerineqarsinnaanngimmata aammalu innuttaasut pisinnaatitaaffigaat inatsisitigut pitsaasumik tugassaqartinneqarnissamut neqeroorfigineqarlutillu pikkorissarneqarlutillu, sapinngisamik kalaallinik inuttaqarnissaa sulissutigineqassammat, Aleqa Hammond erseqqissaavoq.
Danskit inatsiseqarnermut ministeriata Lene Espersenip eqqartussiveqarfimmi ilinniarsimassutsip amigaateqarneranut suut pissutaanerat oqaatigiuminnaatsippaa, maanilu pissutsit atuuttut naapertorlugit eqqartuussinernik ingerlatsisariaqartarnerit paasisinnaanerarlugit, taamaattumillu siunnersuutigineqartut Danmarkimut angerlaallugit saqqumiutissagini sulissutigissaginilu oqarpoq.
