Nunatsinni eqqartuussiveqarnikkut nutarterisoqalerpoq
Nunatsinni eqqartuussivittaami qullersanngortoq taamatut takorluugaqarpoq.
Nunatsinni eqqartuussivittaami qullersaalersoq, Thomas Trier Hansen 40-innarnik ukioqarpoq, inuttullu qanorittuunini ima nammineq oqaatigaa:
- Eqqartuussisutut piukkunnarunanngikkaluarpunga, kisiannili eqqartuussivinniinnikorujussuuvunga, aammali nunarpassuit kultoorerpassuillu allat tikittarnikuuakka.
Aap, Thomas Trier Hansenip inatsisilerituutut ilinniarnini 1997-imi naammassimmagu ilaatigut Malawimi, Georgiami, Sverigemi, Tanzaniami, Nepalimi, Serbiami, Amerika qiterlermi Cambodiamilu sulisareersimavoq.
Ukiumut marloriarluni suli Cambodiamukartarpoq, tamaanimi eqqartuussivinni piorsaanermik aamma suliaqartuummat.
- Cambodiami pissutsit maani pissutsinut ilaatigut eqqaanartoqarput, tassami Cambodiami aamma inatsisileritooqarpianngimmat, qangaanerusormi inatsisilerituujusimasut Pol-Pot-ikkunnit nungusarneqarsimammata.
Thomas Trier Hansen ukiuni pingasuni nunatsinneereersimalerpoq, taannaavorlumi nunatsinni eqqartuussivittaami - tassa Retten i Grønland-imi -eqqartuussisuuninngortussaq, nunatsinnullu tunngatillugu qanoq takorluugaqarnersoq apeqqutigigatsigu ima akivoq:
- Eqqartuussisoqarsimatillugu inernerusoq eqqartorneqarajuttarpoq, tamannalumi aamma ajunngilaq, aammali eqqaamaniangassatta ilaat unaavoq: Eqqartuussivilersuussiniaraanni suliaq sivisusinnaasaqaaq, taamaattoqarneralumi pisariaqavinnersoq apeqqusertariaqarparput.
Aamma suliat pilertornerusumik eqqartuussivinni ingerlanneqarsinnaanissaat qanoq anguneqarsinnaanersoq inuiaqatigiit akornanni eqqartorneqarnerusariaqaraluarpoq, soorlu aamma kalaallisut oqalussinnaasunik amerlanerusunik inatsisileritooqalernissarput qanoq anguneqarsinnaanersoq aamma oqaluuserisariaqaraluaripput.
Kalaallisut oqaasilinnik inatsisilerituunik qanorililluta amerlanerusunik peqalersinnaanersugut apeqqutigigatsigu Thomas Trier Hansen ima akivoq:
- Namminersorlutik Oqartussat ilinniartitaanermut naalakkersuisoqarfiani, Danmarkimilu ilinniartitaanermik ingerlatsisoqarfiit uagullu eqqartuussivitta akornanni ajornartorsiutip qaangerniarnerani suleqatigiissinnaavugut, ilaatigut inatsisilerituutut ilinniartoq inatsisilerituumik ilitsersuisoqartassangaluarpoq, tassa qallunaatut mentor-ordning-imik taaneqartartoq, inatsisilerituunngorniarlu taamatut tulaffissaqassaguni, assersuutigalugu nunatsinni dommerfuldmægtigit - tassa eqqartuussisut inatsisilerituut ilinniarnermut tunngatillugu ingerlaannaq attavigisinnaasariaqarpai, taamaalilluni inatsisilerituunngorniaq toqqaannarnerusumik ikiorneqarsinnaassammat.
Eqqartuussiveqarnerup oqallisigineqarnissaa angujumallugu Thomas Trier Hansen qarasaasiamik qupperniliornialersaarpoq.
