Nuummi coronaqartoqarunnaaqqippoq: Taamaakkallartillugu nuanneq
- Nuannaaqaanga, aamma quttateqaakka ajornerulernatik iluarsisimammata.
Qupanuk Olsen KNR-ip Nuummi aqqusinermi naapitaa oqarpoq.
AAMMA ATUARUK Nunatsinni inuit marluk coronavirusimik tunillatsissimasut peqqisseqqittut
Tassami Nuummi coronamik tunillatsissimasoqarunnaaqqippoq. Tunillatsissimasutut oktobarip aallartinnerani uppernarsarneqartut maanna marluullutik peqqisseqqipput coronaqarunnaarsimallutillu.
Qupanuk Olsenip corona pillugu killiffik malinnaaffigilluarpaa.
- Malinnaaffigisorujussuugakkit coronami kisitsisit, assersuutigalugu Worldometerikkut ippassaq unnukkut marserlunga, Kalaallit Nunaat qorsunngoqqissimasoq takullugu nuannaarpunga. Nun.gl aamma iserlugu alakkarpara ilumut ilumoornersoq coronarunnaarsimanersut. Toqqissiallappunga, taanna oqarpoq.
AAMMA ATUARUK Tamaat isigalugu: Coronavirus pillugu killiffik
Taassuma ungasillisimaarnissamut asannissamullu innersuussutit aamma malilluarpai.
- Ulluinnarni asakulasorujussuuvunga, illutsinnut isernerit tamaviisa tamaavitta meeqqagullu asattarpugut, suliffinni håndspriteqattaaginnavippunga, akuttusoorujussuarmik eqissisarpunga.
- Taavalu inuit nualaartut allat qanillinaveersaaqqissaartarpakka. Suliffinni pinaveersaartitseqataavunga arlaat nuappat oqarfigalugu: Ajoraluartumik sulisinnaanngilatit nuakkavit angerlarsimasariaqarputit.
Toqqusaarlunnera ernumatitsisoq
Mikael Ludvigsenip Nuummi coronamik tunillatsissimasoqarunnaarnera aamma nuannaarutigaa. Pingaartumik nammineq aamma toqqusaarloqqammeriarami.
- Eqqissisimanaqaaq, tupannartarami coronamik tunillatsittoqarsimagaangat, ingammik maani Nuummi.
- Uanga aamma nammineq misisaqarfigilaarakku toqqusaarlorujussuarama qanittukkut. Taava marloriarlunga coronamik testertillunga, tusaqqammerpara tamarmik ajunngitsut.
Taamaakkallartillugu nuanneq
Mads Faber aamma nuannaarpoq – qulalaarlunili. Tunillatsissimasummi qanoq sivisutigisumik 0-imiissappat?
- Taamaakkallartillugu nuanneq, Mads Faber oqarpoq.
- Nunarpummi matoqqatinnginnatsigu avataaniit tikittoqartartoq nalunngilarput. Taamaammat suli isertoqaqqissaaq, kisianni peqqinnissaqarfiup tungaaniit suliniuteqarluartoqarnera ajunngilluinnarpoq. Aqussinnaarpasippaat. Nunarsuarmi sumiiffiit allat qanoq innersut eqqarsaatigigaanni suliniut ajunngilluinnarpoq.
- Coronaqalersinnaanera eqqarsaatigivallaanngilara. Nuanneqaarmi taama inissisimaneq.
Nunatsinni inuit 16-it coronamik tunillatsissimasimapput. Taakku tamarmik peqqisseqqittutut nalunaarutigineqarnikuupput, taakkunanngalu arlaannaalluunniit napparsimmavimmi uninngasimanani.
