Nunatsinni biilinik misissuineq uninngavoq

Nunatsinni biilit ukiut tallimat sinnerlugit misissuiffigineqarsimanngillat. Danmarkimi naalagaaffiup biilinik misissuisarnera namminersortunngorsarneqarmalli nunatsinni biilinik misissuisarneq unitsinneqarpoq. Misissuisarnerlu aallarteqqittussaasimagaluarpoq. Aallarteqqinnissaata tungaanut politiit biilinik misissuisartut politimesterip tullersortigigallagaata, Bjørn Bayip, ima oqaluttuaraa:

- Nunatsinni kingullermik biilinik misissuisoqarpoq 1999-imi. Taamanikkut naalagaaffiup biilinik misissuisartui illoqarfinni assigiinngitsuni biilinik misissuipput. Misissuisartut angalanerat aningaasartuutaasarpallaaqimmat nunatsinnut suli misissuiartortoqarsimanngilaq. Danmarkimilu naalagaaffiup biilinik misissuisarnera namminersortunngorsarneqarmat Kalaallit Nunaanni biilinik misissuisarneq unitsinneqarpoq, Bjørn Bay oqarpoq.

Inatsisinik atortitsinermut angallannermullu ministereqarfimmit nunatsinni biilinik siunissami misissuisarnissaq qanoq ingerlanneqassanersoq suli aalajangerneqanngilaq. Taamaakkaluartorli nunatsinni biilinik misissuisoqartarpoq, politiit namminneq biilitaartoqartillugu misissuisarmata.

- Nutaamik biilitaartoqartillugu illoqarfiup iluani angalaartilluta biilip nutaanngippallaarneranik pasitsaassaqarsimatilluta imaluunniit decembarip qaammataani julefrokosteriartunik unititsinisarnitsinni tamatigut allattuiutigaluta biilinik misissuisarpugut, politimesterip tullersortigigallagaa Bjørn Bay oqarpoq nangillunilu.

- Politiit biilinillu misissuisartut ilinniagaat assigiinngitsorujussuupput taamaakkaluartoq biilinik misissuisarnitsinni biilit ima aserfallatigisimanngillat allaat aquttunut ilaasunullu ulorianarsinnaasarlutik. Annerusumilli aquttup kukkuneratigut biilinik ajutoortoqartarpoq. Uangalu isumaqarpunga biilinik misissuisarnissaq pinngitsoorani ingerlanneqartariaqartoq, Bjørn Bay oqarpoq.

Danmarkimi naalagaaffiup biilinik misissuisarnera ukioq kingulleq januaarip aallaqaataani namminersortunngorsarneqarpoq.